74 aña despues cu e vuelo di Pan Am a crash den awanan serca di Puerto Rico, un suceso cu a cobra bida di 52 persona y a motiva reformanan di gran alcance, incluyendo e sesionnan di informacion di seguridad pa pasahero prome cu vuelo, un ekipo di busca aeronautico a haya e restonan di e avion den fondo di lama.
E Air/Sea Heritage Foundation, den colaboracion cu otro entidadnan, a localisa luna pasa e restonan di e “Clipper Endeavor” di Pan Am den e fondo di Oceano Atlantico, dilanti costa nort di Puerto Rico.
E hallazgo, realisa cu e yudansa di un dron submarino, ta pone un fin na decadanan di misterio tocante e lugar exacto caminda e avion Douglas DC-4 a keda despues di crash den oceano poco despues di a despegá for di Puerto Rico dia 11 di april 1952, cu 64 pasahero y cinco miembro di tripulacion abordo.
Aunke tur e pasaheronan a sobrevivi e impacto inicial, solamente 17 persona a wordo rescata; e resto a perde nan bida hunto cu e avion, cu a sink rapidamente. E investigadornan a atribui e resultado aki na e falta di sesionnan di informacion di seguridad, un fayo cu a pusha pa cambionan den e industria di aviacion.
“Nos tur ta asombra y euforico pa e descubrimento aki, pero tambe nos ta sinti humilde ora nos recorda loke a pasa hopi tempo pasa,” Russ Matthews, presidente y cofundador di Air/Sea Heritage Foundation, a declara. E ekipo di busca, den cual e compania Deep Sea Vision tambe a participa, a uza un sonar di resolucion halto pa localisa e restonan den fondo di lama, na un profundidad di aproximadamente 2.000 pia.
