Internacional: Autoridadnan di Guyana a confirma cu dos persona a fayece y por lo menos 70 otro ta sigui perdi despues cu e ferry MV Barima a bolter structuralmente mientras e tabata biaha for di Georgetown pa Port Kaituma, locual a conduci na un operacion masivo di busqueda y rescate y un investigacion di gobierno riba e tragedia aki.
Papia during un conferencia di prensa diadomingo anochi, Minister di Trabounan Publico Juan Edghill a bisa cu equiponan di rescate ta sigui busca den e area despues di a recupera un di dos curpa un muhe atardi diadomingo.
Oficialnan a bisa cu por lo menos 67 persona a wordo rescata pa diadomingo anochi, e esfuersonan pa determina cuanto hende tabata exactamente abordo di e barco a wordo complica pa motibo di un lista di pasajero incorecto.
Edghill a expresa cu autoridadnan a duna cuenta cu varios pasajero rescata no tabata riba e lista oficial di e barco y a pidi famianan pa raporta parientenan cu ta perdi pa asina yuda establece e cantidad real di hende abordo.
“Como cu nos tin e situacion compromete aki caminda e lista no ta un refleho real di e personanan abordo… por fabor tuma contacto cu nos pa nos por tin un bon bista di ken nos ta buscando,” el a bisa.
Prome Minister Mark Phillips, kende a join e conferencia, a bisa cu Presidente Irfaan Ali tabata na caminda pa regresa Guyana for di Canada diadomingo anochi segun cu gobierno ta intensifica esfuersonan di rescate y a lansa un investigacion amplio.
E investigacion lo involucra Cuerpo Policial di Guyana, Fuerza di Defensa di Guyana, e Departamento di Administracion Maritimo y expertonan tecnico maritimo. Oficialnan lo examina e exactitud di e lista di pasajero, e procedimentunan di carga di pasajero y mercancia, cumplimento cu regulacionnan di seguridad maritimo, y e conducta di e capitan y tripulacion prome y durante e biahe.
“Caminda cu negligencia, mal conducta, of delitonan criminal wordo estableci, esnan responsable lo enfrenta e forsa completo di ley,” Phillips a bisa. “No lo tin excepcion y ningun tolerancia pa accionnan cu ta pone bida di inocente den peligro.”
Oficialnan di salud a bisa cu 50 pasajero rescata a wordo hiba pa Charity Hospital, caminda cu cuater di nan tabatin mester di tratamento medico adicional. Otro 17 di e sobrevivientenan a wordo transporta pa Lima Hospital door di botonan di rescate priva. Equiponan medico ta keda cla pa actua segun cu e esfuersonan di rescate ta continua.
Sobrevivientenan a describi scenanan spantoso segun cu e barco a cuminsa drenta awa diasabra anochi.