Despues di e aprobacion di Senado, e diputadonan di e Asamblea Nacional tambe a aproba e ley, cu 279 voto na fabor y 81 contra. Parlamento frances a aproba e diamars aki un proyecto di ley cu ta prohibi e acceso na rednan social pa menor di 15 aña, loke ta pone Francia na vanguardia di e iniciativanan aki den Union Europeo.
Esaki ta habri e caminda pa Francia uni su mes na e cantidad creciente di paisnan cu ta tumando medidanan pa restringi e acceso na rednan social debi na e advertencianan creciente tocante nan efectonan dañino pa menor di edad.
“Francia ta habri e caminda den Europa pa e proteccion di nos muchanan. Nos ta sigui avansa,” e presidente frances, Emmanuel Macron, a declara caminda e ta repasa su lucha pa e medida aki.
E mandatario kier converti e proteccion di menor di edad riba rednan social y e regulacion di tempo dilanti di e pantayanan den un di e logronan mas importante di su di dos mandato, cu ta termina na mei di 2027.
E prohibicion lo wordo implementa den dos etapa: a parti di 1 di september, ora cu e alumnonan regresa na e klasnan despues di vakantie, e menornan di 15 aña no lo por crea cuentanan nobo. Segun e texto, e prohibicion lo aplica a parti di januari di 2027 pa e cuentanan cu existi caba.
“Tur hende na Francia lo mester demostra nan edad. Si bo tin menos di 15 aña, lo sera bo cuenta,” e minister, Anne Le Hénanff, a splica.
E ta inclui tambe e prohibicion di celular den scol secundario, manera ta pasa caba den e scolnan basico y den e centronan di prome ciclo di secundaria.
E ley no ta inclui ningun sancion pa e muchanan ni pa e mayornan. Lo ta responsabilidad di e plataformanan pa implementa un sistema di verificacion di edad, of incluso varios simultaneamente, pa e usuarionan por scoge.
