Diasabra siman pasa Rotary Club Aruba a instala su directiva nobo pa 2021–22. Presidente saliente Geert Rep a hiba un discurso pa asina duna un relato di su aña. Un aña diferente door di e pandemia covid-19 cu a sigui impacta nos isla pero sigur uno memorabel. Geert ta sumamente orguyoso di e miembronan y di e club cu a sa di duna nan sosten pa asina Rotary Club Aruba por a sigui cu su aporte y sosten na diferente fundacionnan riba nos isla.
Durante e anochi di instalacion, Geert a haci entrega tambe di reconocimento na un paar di miembro di Rotary Club Aruba cu a destaca durante e aña y asina termina su presidencia den un forma super ameno y positivo.
E anochi a sigui cu instalacion di e directiva nobo bao di guia di Frederick Nuboer, kende a wordo apunta como e siguiente presidente di Rotary Club Aruba pa aña 2021 – 2022. Frederick ta miembro di Rotary Club Aruba desde 2015. E otro miembronan di directiva a keda como lo siguiente: Rubiela Lampe-Chiquito (secretaria), Diego Acevedo (tesorero), Geert Rep (presidente saliente), Emilie Arends (vice presidente), Kareline van der Linden (relacionista publico), Shelby Maduro (miembrecia), Lufrido Croes (projectonan), Don de Veer (Fundacion Rotary International) y Kapil Sawilani (sergeant at arms).
President Frederick a hiba palabra gradiciendo Geert y e directiva saliente pa e bon trabao den e tempo nan cu hopi reto door di e pandemia covid-19. E directiva e aña aki lo kier focus ariba contribui na trece positivismo y animo den nos comunidad por medio di diferente proyectonan di Rotary Club Aruba, sin lubida e famoso Fiesta Rotaria cu den e ultimo 2 aña no por a wordo ehecuta. Frederick a pone enfasis riba un aña activo y a uni su mes na tema internacional di Rotary cu ta “serve to change lives” algo cu sigur ta biba den miembronan di Rotary Club Aruba. E anochi a sigui cu “pinning” di un miembro nobo Gianina de Freytas, un (ex) Rotaractor cu ta sigui crece den e famia di Rotary.
Presidente Frederick ta sumamente orguyoso di e impacto positivo cu Rotaract Club Aruba y clubnan Interact Club Colegio Arubano y Interact Club Aruba na de Schakel tin den nos comunidad. Sin lubida di e logronan bunita cu clubnan menciona a alcansa riba nivel internacional den area di sostenibilidad. Presidente Frederick tin tur confiansa den loke e directiva nobo di e club aki riba menciona lo trece e aña aki den nos comunidad.
Por ultimo Frederick kier a duna un danki na e comision cu a organisa e anochi bunita aki y sin laga afo e staff di Hyatt Regency Aruba Resort Spa And Casino cu sa di adapta y sigui cu e anochi special aki pa Rotary Club Aruba.
