Sra. Jessica Maduro Irausquin, Directora Suplente di Stichting Katholiek Onderwijs Aruba (SKOA), a comparti un bista general y un evaluacion di e aña escolar 2025-2026, ilustrando con e proceso a transcuri y con e fundacion ta preparando caba pa e inicio di e proximo aña escolar.
Un aña escolar exitoso y yen di actividad
Sra. Maduro Irausquin a califica e aña escolar 2025-2026 como uno positivo, caminda e scolnan por a cana bon. El a resalta cu pa prome biaha a organisa un misa di apertura special den dos dia pa tur e scolnan structuralmente uni. Ademas, a duna inicio na e “SKOA National Onderwijs Congres” y e “Semana di Educacion: SKOA y di Week”, duna un plataforma di taller (workshops) pa tur personal den veld di enseñansa.
Un momento di gran importancia pa e fundacion tabata na januari ultimo, ora cu SKOA a cumpli 55 aña di existencia. Pa conmemora e milestone aki, a organisa un misa di bendicion den tur parokia riba e mesun fecha pa recorda e aniversario. A pesar cu tabatin algun reto y menos bon noticia durante e periodo aki, SKOA ta mira atras riba un aña cu a cana bon en general.
Cifranan di inscripcion y stabilidad Riba e topico di inscripcionnan, e Directora Suplente a splica cu ora ta compara e cifranan abase di e data di añanan anterior, tin un subida. Analisando e cifranan di nacemento di e ultimo cuater añanan, por nota un fluctuacion caminda algun aña ta mustra un bahada. Sinembargo, e situacion actual di e cifranan general ta keda stabiel.
Sra. Maduro Irausquin a aclaria tambe un cambio den structura di e klasnan: mientras cu tin cierto scolnan cu ta mantene dos prome klas (manera 1A y 1B) debi na e cantidad di mucha, tin otronan caminda a nota un bahada temporario pa un solo prome klas. Toch, e cifranan a pick up bek, indicando cu SKOA no a bay atras compará cu un of dos aña pasa.
Yamada urgente pa finalisa inscripcion y pago Pa e aña escolar nobo cu ta briyaning dilanti, specialmente pa e muchanan cu ta drenta scol pa prome biaha (sea kleuter o prome klas di scol basico), SKOA tin e inscripcionnan nobo habri.
FECHA LIMITE IMPORTANTE: Mayornan tin te cu 4 di augustus 2026 pa pofinalisa e inscripcion online, realiza e pago escolar y e pago di airco, y entrega tur e requisitonan necesario.E Directora Suplente a emiti un advertencia pa motibo cu e cupo den hopi scol ta masha limita caba. Pa loke ta kleuter, no tin hopi cupo mas disponibil, ya cu 99% ta yen caba. Pa scol basico, e situacion ta similar, caminda 97% di e cuponan ta ocupa.Mayornan mester cumpli cu e registracion y pago prome cu 4 di augustus pa asina por asegura un cupo pa nan yiu y asina cuminsa e aña escolar nobo dia 20 di augustus 2026.
