Si, en berdad ta asina cu a cuminsa cu e proceso pa forma kico lo bira e formula, manera nan ta bisa, cu nos lo bay mesa di discusion pa yama dialogo social of dialogo nacional. Pa esey a institui un comision y di e comision aki, mi a comprende tin diferente reunionnan andando, pero te ainda no tin resultado concreto, al menos no definitivo.
E idea di e comision ta pa structura tur cos entre trahadornan y gobierno di Aruba, na unda lo, lo discuti y purba, manera nan ta bisa, influencia posicion di otronan p’asina nan yega na posibel solucionnan p’asina por tin un miho direccion. Tin e discusion cu si kier involucra, por ehemplo, otro gruponan, pasobra e experticio y conocemento y habilidad di hopi otronan eyfo’ ta importante y por aporta na e discusionnan. Pero e formula definitivo no a ser defini ainda, y esey, mi ta kere, tin un poco discusionnan andando. Mi tin cu bisa tambe cu e idea lo ta pa prioritisa e cual ta e puntonan mas importante pa cuminsa cu e dialogo aki nan.
Aki nan tampoco nos no a haya informacion ainda cu tin un decision definitivo cual ta e prome puntonan. Naturalmente, si nos a toma nota cu tin puntonan cu di tanto gremio sindical como gremio di dunado di trabou y di pais Aruba, of e gobierno di Aruba, tin, por nifiká como punto di prioridad. Anto esey por nificá cu e puntonan aki por bin riba mesa mas lihe cu ta posibel. Pero te cu aworakinan, mi tin cu bisa, e tema aki ta un poco pega, pa no bisa stanca, pero nos ta spera cu pronto e partidonan por sali for di otro y p’asina e discusion por cuminsa na mesa realmente.
Preocupacionnan Principal (Sector Publico)
Bon pa loke ta trata preocupacion di nos miembronan, hopi di nos puntonan ta riba nivel bilateral. Osea, cu tin cu wordo atendi cu gobierno como dunador di trabou. Anto esey, naturalmente, no ta un tema cu lo mester bay wordo discuti den dialogo social.
Nos mester por papia ariba cu gobierno riba e falta di personal, cu tin un presion enorme riba e sector publico, riba e diferente departamentonan, servicionan esencial cu no tin suficiente personal y cu tin presion riba e trahadornan, y ta causa e, manera nan ta bisa, absentismo halto, etc.
Y na final, tin su consecuencia of su efectonan pa cu e servicio cu mester wordo brinda. Y asina tambe nos mester por papia riba e nivel di costo di bida, cu ta afectando empleadonan publico. Empleadonan publico ta keda atras y tin su consecuencia riba cu e salarionan ta keda abou, cu ya e no ta competitivo mas, cu locual cu tin eyfo den sector priva.
Y kisas esey ta un di e argumentonan hopi pisá aworaki nan cu tin, cu e hecho cu salarionan ey, en realidad, ta un poco abou, y hopi di nos hendenan, di nos hobennan, esaki no ta atrae e hoben pa bin traha den sector publico.
Den sector publico tambe tin hopi escepticismo pa cu e empleadonan publico pa, manera nan ta bisa, of trahadornan di afo pa traha den sector publico, pa motivo cu tin hopi politisacion den e aparato, esta politikeria. Anto esey ta haci tambe cu hendenan no ta expresa, nan ta laga tur cos pasa y asina hopi cos ta keda stanca na e momento aki.
Reorganisacion di departamentonan cu tur efectonan cu por ta positivo pe trahadornan ta keda tarda masha hopi mes, y e trahador ta mire esaki manera demotivacion pa nan pa sigui asina den e aparato publico.
Y si antes, manera nan ta bisa, tabatin un di e factornan cu tabata atrae trahadornan pa bin traha den gobierno, cu tabata ta un areglo di pension cu tabata basta atractivo, pa e ultimo añanan ya e ta na un hecho cu e edad di pension nos mester bay 65 aña ta un demotivacion pa nan y di dos tambe, e middelloonregeling. Anto e ora ey e hende ta compara cu lo cual cu tin e eyfo no ta compara, pero nos mester bisa tambe, toch tin dunadornan di trabou cu a cuminsa avansa hopi lihe den e pension general, pero cu ta duna hopi mas porcentahanan y cu ta haci’e e ora ey mas atractivo tambe.