Den un declaracion recient, e CEO di Aruba Hotel and Tourism Association (AHATA), Tisa LaSorte, a trece dilanti e realidad preocupante cu e mercado laboral di Aruba ta enfrentando. Mientras cu e sector turistico y comercial ta sigui expande, e falta di personal local ta keda un di e desafionan mas grandi pa e desaroyo economico di e isla.
Competitividad y bienestar laboral LaSorte a splica cu, debi na e escasez di man di obra, e companianan mester bira mas creativo pa atrai trahador. Esaki a hiba na un competencia positivo unda cu e dunadornan di trabou ta implementando miho beneficio y salarionan mas halto pa ofrece un miho bienestar na e trahador.
“E dunador di trabou tambe mester siña con pa ta competitivo y con mi por gisa e beneficio cu mi ta duna na e trahador pa mi ta atractivo pa e bin traha cerca mi. Dus tur esaki ta algo positivo, y esaki ta tumando lugar; salarionan a subi hopi, e beneficionan a cuminsa cambia, ta mas creativo,” LaSorte a declara. Un problema mundial y e necesidad di planificacion Sinembargo, e CEO di AHATA a enfatisa cu e aumento di beneficio no ta soluciona e problema por completo, ya cu e escasez di trahador ta un fenomeno mundial. Pa e razon aki, el a haci un yamada na gobierno pa structuralmente cuadra e otorgamento di permiso di hotelnan nobo cu e disponibilidad di trahador.
Si companianan ta keda habri, si sigui duna permiso pa hotel habri, of pa hotel traha su hotel, bo ta bay tin mester di mas hende. Dus ora bo ta plania, ora bo ta duna e permiso, bo mester plania pa esaki tambe,” el a splica. Desconexion den e mercado laboral y e papel di inmigracion
Tocante e relacion entre e vacaturanan existente y e profesionnan cu e rubianonan ta studia, LaSorte a señala un “disconnect”. Hopi Arubiano ta studia carera den exterior cu no ta cuadra cu e demandanan actual di e mercado local, locual ta aumenta e necesidad di busca personal fuera di Aruba.
Finalmente, LaSorte a reconoce y gradici e esfuerso di Ministerio di Husticia cu e maneho di regularisacion, locual a yuda miles di persona indocumenta drenta legalmente den e forsa laboral.
“E maneho di Minister di Husticia a yuda hopi, pasobra e ora bo ta tin miles di persona cu tabata indocumenta na Aruba cu awor por traha legalmente y participa den e forsa laboral legalmente, y ricibi nan proteccionnan y paga impuesto. Esaki ta algo positivo pero claro, e solucion no ta full, nos no a yega full na un solucion ainda,” el a conclui.
