Parlamentario Muzaninn Wever a baha su bos riba e situacion actual den enseñansa na Aruba, caminda el a trece dilanti e retonan grandi cu nos docentenan ta enfrentando diariamente. Wever ta enfatisa cu inverti den enseñansa no ta solamente baha den e calidad di materia (e stuff) cu ta siña, pero tambe den e bienestar di e maestro y e personal di sosten necesario pa maneha e problemanan social den nos scolnan.
Segun Parlamentario Wever, un di e problemanan mas grandi na e momentonan aki ta e peso di trabou (workload) enorme cu e docentenan tin.
Aworaki un maestro ta wordo pidi pa ta ‘dies profesional den un’. Fuera di duna les, nan tin cu fungi como social worker, family counselor, experto di IT, y te hasta psicologo. E docentenan tin demasiado tarea, loke ta haci cu nan no ta haya e chance pa ehecuta centralmente e profesion pa cual nan a studia, Wever a declara.
Sosten structural den scolnan
Wever a splica cu pa por alivia e carga aki, scolnan tin mester di mas sosten structural. E presencia di social workers den scol ta crucial pa asina e profesionalnan aki por encarga nan mes cu e problemanan social di e studiantenan. Di e forma aki, e studiantenan por surpasa e opstaculo- y problemanan aki y e docentenan por concentra full porciento riba e materia den klas. “Bo no por expect pa un maestro atende cu tur dos asunto pareu conosiendo nos realidad social.”
Negociacionnan y aumento di beneficio
E parlamentario a confirma cu e ta na altura cu Minister Endy Croes ta trahando fuertemente riba e materia aki. E prome fase di e incremento di salario pa docentenan ya a wordo implementa.
Actualmente, e proceso aki—cu ta consisti di tres fase—ta den e di dos fase di negociacion. Maske Wever ta admiti cu tin un falta di comunicacion den e proceso, e ta compromete su mes pa sigui pusha for di Parlamento pa monitoria e negociacionnan aki estrechamente. E meta ta pa wordo formalisa e fase 3, specialmente mirando e competencia regional caminda islanan biniendo manera Boneiro ta ofrece miho condicionnan laboral y beneficionan atrayente, provocando un escasez di docente local.