Den un declaracion biniendo directamente di curason, Edwin Willems a kibra silencio pa papia tocante e accidente fatal spantoso cu a involucra su mayornan. Cu un dolor profundo pero determina, Willems a saca cara pa su mama y su padrastro, exigiendo husticia pa e defuntonan y hayando e falta di empatia cu e acusado a mustra te cu dia di awe.
“Husticia, ami ta pidi pa e defuntonan,” Willems a declara. “Famia ta papi di hende decente y ni siquiera un sorry a wordo dirigi te dia di awe, dia di e sucedido”. Mientrastanto, el a aclaria cu e no ta buscando un disculpa pa asina trece su mama bek, sino cu un sorry ta na su lugar pa mustra kiko clase di persona e acusado ta. “Mirando cu no tin niun tipo di empatia na nan ser kerinan, y tampoco na nos famia, nos tampoco lo tin niun clase di empatia pe acusado”.
Durante e proforma anterior, Willems a splica cu e no a nota niun tipo di arepentimento of duele di parti di e acusado pa e situacion cu el a causa. Al contrario, el a señala cu a purba di tira tur culpa riba e victimanan, lo cual ta conduciendo na rabia den comunidad y mas dolor den e familiary amistanan.
Exigencia pa un castigo mas husto (TBS)
Willems a enfatisa cu e berdadero victimanan ta e defuntonan y e famia cu a keda atras cu un dolor imenso, specialmente su yiunan cu constantemente ta puntra pa nan wela. Ante e falta di arepentimento, Willems a anuncia cu via di nan abogado, nan lo pidi pa duna e acusado un castigo di TBS (Terbeschikkingstelling) den su sentencia. “Si nan kier bay den direccion ey di play loco, e ora nos ta bay pidi via nos abogado pa duna e juffrouw TBS den su sentencia”.
E daño emocional y psicologico ta enorme. Willems a comparti cu su yiunan tabata custumbra di comparti tur weekend cu nan wela. Awor, nan mester di ayudo psicologico. El a cuestiona tambe e diferencia den tratamento, manifestando cu mientrastanto e yiu di e acusado a haya ayudo di psicologo mas lihe, su yiunan mester a spera seis luna pa esaki. “Esey ta e daño cu e juffrouw a ocasiona nos”.
Sostene na Ministerio Publico y un bando pa Aruba
A pesar di e trauma, Willems a expresa su gratitud na Ministerio Publico (OM) y na e fiscal encarga pa e tremendo y correcto investigacion cu nan ta ehecutando. El a resalta cu esaki mester sirbi como un les pa e comunidad di Aruba:
“Gente inocente no por sigui paga pa hende nan irresponsabel sin concenshi, lagando famia nan den dolor y comunidad den shock. Nos ta boga pa husticia.”
Willems a conclui indicando cu, aunke e dolor ta grandi, e ta sinti un alivio mirando cu pa prome biaha den historia di Aruba, un persona cu a causa un hit and run ta wordo procesa pa intento di asesinato y asesinato. El a recorda cazonan anterior, manera esun di Sandra’s, caminda coredo bao di influencia y den direccion contrario a causa morto y a sali den libertad den corto tempo. “Nos ta contento cu lo cual nos ta logrando ta cu por fin na Aruba, por bin husticia, pa e pagamunderia aki por caba”.