Fundacion Anti Droga Aruba (FADA), den persona di Rulienne Arends, a comparti un bista preocupante riba e desaroyonan mas reciente rond di e bishitanan escolar di e aña escolar 2025-2026. Arends a elabora riba e temanan cu mas ta sobresali y a lansa un yamada di atencion urgente na comunidad, specialmente pa locual ta trata vaping y e falta di control estricto riba benta di esakinan na menor di edad.
Temanan di mas pidi: Adiccion y Salud Mental
Durante e bishitanan escolar, FADA a nota cu e focus mas grandi ta keda riba adiccion combina cu salud mental. E peticionnan pa charlanan riba e topiconan aki ta keda hopi halto, tanto den scolnan basico como secundario. Pa locual ta trata substancianan, e topiconan mas solicita ta inclui:
Vaping (e topico number uno mas pidi)
Alcohol y Marihuana
Ecstasy y Cocaina
Uzo di Video Games y Social Media (cual a mira un aumento drastico den e ultimo lunanan y simannan di aña escolar, specialmente como preparacion pa vacacion).
Arends a subraya cu e peticionnan pa charlanan riba salud mental tambe ta hopi halto, no solamente di parti di scol basico y secundario, sino tambe di parti di companianan cu ta bati na puerta di FADA.
E realidad peligroso di Vaping y Nicotina Un di e puntonan mas crucial cu Rulienne Arends a aclaria ta e mito rond di e contenido di e vape-nan cu e hobennan ta uza. Arends a enfatisa cu mayoria di e vapenan ta contene nicotina (hopi biaha te cu 5% di nicotina, loke ta un cantidad hopi halto). E ta splica cu pa adkiri un vape sin nicotina, mester bishita un vape shop oficial unda ta bende e liquido apart, pero e vape-nan cu e hobennan tin acceso na dje den formanan menos regula, lamentablemente tur ta contene nicotina. FADA ta traha activamente pa concientisa e studiantenan for di di 5 klas di scol basico, ya cu den hopi caso e muchanan no ta conciente di e peligro aki y ta uz’e djis pasobra nan ta mir’e den nan contorno of riba social media.
Falta di control y benta di vape na menor di edad
Haciendo un comparacion cu Estados Unidos unda e control di ID ta rekeri estrictamente pa cualkier persona te cu 30 of 40 aña Arends a lamento cu na Aruba e situacion ta hopi diferente y for di control. FADA tin añanan caba ta vocifera e preocupacion aki, prome cu e situacion a escala na e nivel preocupante di awe.
Arends a comparti un informacion fastioso pa ilustra e gravedad di e asunto:
Un docente a tuma contacto cu FADA despues cu un mucha di scol basico (menor di edad) a bay un supermercado local y a cumpra un vape. Ora cu e vape no a funciona, e mucha a regresa e supermercado. E personal di e supermercado a pidi e menor di edad pa e “teste” eynan mes dilanti nan pa mira si e ta traha.
Arends a señala cu tin un buraco grandi den e implementacion di ley y control di benta na Aruba, unda cu no ta pidi ID debidamente y supermercadonan ta probecha di e falta di control aki. Maske cu ciudadanonan preocupa of FADA mes topa cu e situacionnan aki y raporta nan, e unico lo cual ta wordo duna ta un advertencia , sin cu tin consecuencianan mas severo.
FADA ta reitera, sin temor, cu e situacion aki tin cu cambia. E uzo di vape ta wordo bisto door di e hobennan como algo normal y inocente, pero e falta di control riba e edad legal (cu mester ta 21 aña pa ley) ta habri caminda pa e problematicanan aki sigui crece den nos comunidad.