Biblioteca Nacional Aruba (BNA) ta preparando pa un aña escolar nobo 2025-2026, enfocando riba e papel crucial cu e instituto ta hunga den e formacion y desaroyo di e studiantenan na Aruba. Directora di BNA, sra. Astrid Britten, a duna un splicacion detaya tocante e servicionan, e transicion di e studiantenan, y e importancia di mantene e amor pa lesamento bibo, tanto den forma fisico como digital.
Un momento emocionante di transicion
Sra. Astrid Britten a expresa cu e final di un aña escolar y principio di un nobo semper ta un momento pa gradici y celebra. E studiantenan cu a traha duro durante henter aña awor ta cla pa e siguiente paso. Sea cu nan ta drenta den e forsa laboral, of cu nan ta sigui nan estudio akinan mes, den region of na Hulanda, e ta un momento hopi emocionante pa nan.
Como un instituto cu ta encarga cu e formacion di e studiantenan, Biblioteca Nacional Aruba ta duna un aporte vital den e proceso aki. “Nos ta habri nos porta pa asina nan por adquiri conocemento, locual ta e resultado final di nan esfuerso,” sra. Britten a splica.
Servicio pa tur edad y necesidad
E biblioteca no ta un luga solamente pa studiantenan mas grandi; e muchanan mas chikito tambe ta bonbini pa prepara nan spreekbeurt, uza computer pa busca informacion digital, of simplemente pa busca e bukinan cu nan mester lesa.
Sra. Britten a asocia e temporada aki tambe cu e studiantenan cu tin nan examenbuki na cas:
“Awor cu nos ta den vakantie, e studiantenan por trece e bukinan aki bek. E ta hopi importante pa e bukinan bolbe, ya cu esaki ta duna nos e oportunidad pa yuda e siguiente grupo di studiante cu tambe lo mester di e informacion ey pa nan aña escolar.
Membresia gratis pa hoben y acceso na Biblioteca Digital di Hulanda
Un di e gran bentahanan cu BNA ta ofrece ta cu e membresia pa hoben te cu 17 aña ta completamente gratis. Cu esaki, e biblioteca ta busca pa stimula lesamento bou di e hubentud.
Ora un hoben bira miembro, e ta ricibi un codigo cu ta dale acceso tambe na e Biblioteca Digital di Hulanda. Sra. Britten a enfatisa cu e buki fisico y e informacion digital ta complementa otro den e mundo moderno aki, brindando e miho di tur dos mundo na e uziario. Segun e directora, hopi mucha y biahhero ainda ta opta pa e buki fisico pa e comodidad cu e ta ofrece, demostrando cu e dos formistanan aki por coexisti perfectamente.
Un aumento den publicacion di autor local
Mirando e añanan recient, sra. Britten a comparti cu orguyo cu tin un gran demanda y interes pa presentacion di buki door di autornan local. Pa e aña escolar aki, BNA tin caba varios reservacion pa buki tanto na Papiamento como na Ingles. E meta principal ta keda pa enfoca riba esaki y inculca den e comunidad e balor di lesamento.
Sra. Astrid Britten a bisa:
“Lesamento no ta solamente un placer, sino un herment potente cu ta habri porta y ta crea oportunidadnan nobo pa un y tur.”