Segun FIFA a informa, presidente Donald Trump lo asisti na e final di e Mundial y lo entrega e copa na e seleccion campeon. Di acuerdo cu e maximo organo regulador di futbol internacional, Trump lo bay tey proximo 19 di juli na e wega decisivo di e Copa di Mundo. FIFA a confirma na AFP cu Gianni Infantino, presidente di FIFA, a haci e anuncio ey un poco prome cu un entrevista.
“Nos lo ta hunto cu e presidente (Trump) disfrutando di e final y entregando e trofeo na e ganado,
por lo pronto, hunto”, Infantino a bisa. Ta bon pa corda cu presidente di Merca a entrega e trofeo di campeon na Chelsea den e final di e Mundial di Club, celebra na Merca na aña 2025. Durante e acto di premiacion despues di e victoria di Chelsea riba Paris Saint-Germain (PSG), Trump a sorprende ora el a subi escenario hunto cu e presidente di FIFA, Gianni Infantino, y a entrega e copa na e capitan di e team ‘blue’.
En bes di a retira despues di e entrega, e mandatario di Cas Blanco a keda riba escenario, mesclando su mes entre e hungadornan durante e celebracion oficial, locual a genera gran sorpresa.
E final di e Copa Mundial di FIFA lo wordo hunga diadomingo 19 di juli di e aña aki 2026. Lo ta MetLife Stadium e stadion cu lo ta sede e final di e evento deportivo aki.
