Internacinal: Bogota y Cali tabata e centro di un anochi caotico despues di a conoce cu e candidato di derecha Abelardo de la Espriella tabata e ganador di eleccion, tras di a derrota e iskierdista Iván Cepeda pa un margen chikito.
Segun loke a wordo raporta, den e capital Colombiano tabatin fuerte blokeonan den transporte, loke a pone cu mester a sera varios stacion di TransMilenio. Debi na esaki, e empresa a bisa cu a bini un clausura di por lo menos 23 stacion: “Na e momento aki manifestantenan ta presente y ta blokia e paso na Carrera 10 cu Calle 27 Sur, den tur e rutanan. Asina tambe tabatin fuerte desordonan cu a inclui vandalismo manera kimamento di tayer y algun intento di pega candela na algun warda di Polis. E alcalde di Bogotá, Carlos Fernando Galán, a informa cu Polis mester a interveni den e distritonan di Kennedy y Usme despues di e fuerte disturbionan. E mandatario local a bisa cu tabatin intencionnan di ataca varios warda di Polis, pero cu tur cos por a wordo controla na tempo.
Na Cali, tambe a raporta vandalismo na 15 camara di mobilidad (flitspalen), daño na un bus, un caha di banco automatico (ATM) y cuater stacion di MIO. Tocante esaki, e gobernadora di Valle del Cauca, Dilian Francisca Toro, a ofrece un recompensa di 200 miyon peso Colombiano pa esnan responsabel di e hechonan aki.
E disturbionan den ambos ciudad a tuma luga despues di a conoce cu Abelardo de la Espriella a gana den e preconteo di e di dos ronda electoral, tras di a derota e iskierdista Iván Cepeda pa un margen hopi sera.
