Internacional: 13 persona a perde nan bida den un explosion na un terminal di gas natural na Qatar. Nan tabatin e nacionalidad India y Pakistanes. Ademas, 66 persona a keda herida, pero ningun di nan ta den peliger di morto. Esaki e minister di Energia, Saad al-Kaab, a haci publico.
E minister di Energia a ripiti cu ta trata di un accidente y cu no tin ningun indicacion di un atake of sabotaje. Mas trempan den dia, e minister di Relacionnan Exterior a papia caba di un problema tecnico. Autoridadnan a inicia un investigacion tocante e causa di e explosion.
E explosion a tuma luga durante trabounan den e fabrica Barzan na e zona industrial Ras Laffan. E trahadonan tabata ocupa legalisando y preparando e complex pa un reapertura. Na maart, e tereno a sufri daño grandi debi na un atake aereo di Iran. Prome cu esey, e trabou tabata para caba debi na e guera.
Qatar ta produci casi 40 miyon metro cubico di gas pa dia den e fabrica Barzan. E parti mas grandi di e fabrica ta propiedad di Qatar, y ExxonMobil tambe tin un parti chikito di accion. Segun minister di Energia, e incidente no tin consecuencia pa e suministro di gas domestico, ni pa exportacion.