Na Merca a confirma 1.645 caso di ciclosporiasis desde dia 1 di mei, y mas di 5.100 caso adicional ta bou di investigacion, asina e Centro pa Control y Prevencion di Enfermedad di Estados Unidos (CDC) a informa, loke ta representa un subida fuerte di casonan en comparacion cu e ultimo añanan.
Un brote cu ta extendiendo na Michigan y Ohio tambe a wordo vincula cu casonan na West Virginia y Kentucky, segun e agencia a indica. Personanan cu ciclosporiasis por presenta sintomanan, incluyendo diarea muha, cramp di bariga pa simannan largo.
E actividad di Cyclospora tin tendencia di aumenta durante proximo dianan, pero e cantidad di casonan confirma desde dia 1 di mei caba ta mas cu seis biaha mas halto cu esun registra riba e mesun fecha aki aña pasa, segun un alerta di salud emiti pa CDC. Si inclui e mas di 7.000 casonan posibel cu ta confirma of den fase di investigacion, e total di e aña aki ta 27 biaha mas halto cu e total di aña pasa riba e mesun fecha aki.
“Esaki ta hopi, hopi mas halto cu loke nos a mira aña pasa of e aña prome cu esey,” Dra. Gwen Biggerstaff, subdirectora di e Division di Enfermedadnan Transmiti pa Cuminda, Awa y Medio Ambiente di CDC a bisa, llamando esaki “un cambio masha grandi” compara cu temporadanan anterior.
Aproximadamente 1 di cada 11 caso tabatin mester di hospitalisacion, segun e datonan disponibel pa CDC. No a reporta ningun morto.
Un informe di investigacion adicional publica pa CDC diamars aki ta señala cu rond di 400 caso den por lo menos cuater estado —Michigan, Ohio, West Virginia y Kentucky— “ta parse di ta epidemiologicamente relaciona, loke ta sugeri cu por tin un fuente comun pa e infeccionnan aki”.
E departamento di Salud estatal di Michigan a reporta mas di 3.300 caso di Cyclospora durante e investigacion di e brote. Michigan a bisa cu nan a entrevista mas di 1.000 persona como parti di nan investigacion, y e resultadonan actual ta sugeri cu lechuga of saladanan berde por ta un fuente potencial di e brote.
Sinembargo, e estado a bisa cu nan no a descarta nada. “No a identifica un tipo di producto, productor of proveedor specifico como e fuente,” e estado a declara.
Cyclosporiasis generalmente no ta plama directamente di persona pa persona. En bes di esey, hende por infecta ora nan consumi cuminda of awa contamina. Brotenan anterior tabata vincula na productonan fresco, CDC ta bisa.
E cadena di Fast Food, Taco Bell a bisa cu nan tabata kitando algun ingrediente for di nan menu na algun di nan restaurantnan como precaucion.
“E funcionarionan di salud publico no a confirma un vinculo cu Taco Bell of cu cualkier ingrediente, proveedor, restaurant of detayista especifico,” Taco Bell Corp. a bisa den un comunicado. “Mientras cu e autoridadnan ta continua cu nan revision mas amplio, Taco Bell den forma voluntario y temporal a elimina algun ingrediente limita na restaurantnan selecto como un medida di precaucion. Nos lo sigui monitor e situacion di serca y sigui e directivanan di e autoridadnan di salud publico.”