E gobierno britanico a pidi FIFA pa investiga e seleccion di Argentina despues cu varios hungador a pose cu un pancarta caminda tabata reivindica e soberania riba e disputa di Islanan Malvinas.
Argentina a gana Inglaterra 2-1 den e di dos semifinal di e Mundial cu a wordo hunga diaranson na Atlanta. Durante e celebracionnan despues di e wega, e futbolistanan argentino a tene un pancarta cu e fanaticonan a pasa pa nan for di e tribuna cu tabata bisa “Las Malvinas son argentinas” (E Malvinasnan ta di Argentina).
Argentina ta referi na e Islanan Falkland como Islanan Malvinas. E islanan aki a wordo invadi na aña 1982 bou di orden di e dictadura militar argentino di e tempo ey, loke a provoca un guera di 10 siman cu Reino Uni a gana.
E secretario di Negoshi di Reino Uni, Peter Kyle, a declara cu e comportamento di e hungadornan tabata “totalmente inadecuá. Mi ta spera cu FIFA lo hiba un investigacion profundo”.
E organo regulador di futbol mundial por procesa e hungadornan di Argentina y e federacion di futbol pasobra nan codigo disciplinario ta prohibi cualkier “mensahe cu no ta apropia pa un evento deportivo” den e stadionnan, incluyendo esnan di “naturalesa politico, ideologico, religioso of ofensivo”.
E multanan di FIFA pa mensahenan politico ta varia entre 5.000 y 20.000 dollar.
