Transparencia y cumplimento cu reglanan di bon gobernacion ta esencial pa mantene e confiansa di comunidad. Den e cuadro aki, Parlamentario Rocco Tjon a expresa su preocupacion tocante e falta di publicacion di e conseho di LAR, relaciona cu e uzo di fondo publico pa un biahe den jet priva.
Tjon a señala cu dia 10 di juli ultimo, e Bezwaaradviescommissie LAR a entrega su conseho oficial na e Minister encarga cu Enseñansa, Gerlien Croes, relaciona cu e obhecion (bezwaar) presenta dia 30 di maart 2026. Segun e carta di LAR, e Minister mester entrega un copia di e conseho na e partidonan concerni.
Sinembargo, Parlamentario Tjon a enfatisa cu ya a pasa mas di 10 dia caba y te cu awe e Minister no a manda e copia y ni publica e conseho aki.
E minister tin 6 siman pa dicidi, pero e obligacion estableci den Constitucion pa duna informacion na Parlamento y pueblo no por warda. E pueblo di Aruba tin tur derecho di sa kico e conseho oficial di LAR ta contene. E obligacion pa comparti esaki no ta opcional. E ta un obligacion legal. Te cu awe, e Minister no a cumpli cu ne.