Parlamentario mr. Mike De Meza a expresa su gran preocupacion den ultimo lunanan, enfocando fuertemente riba e falta di atencion cu e districtonan di Pariba di nos isla, specialmente San Nicolas, ta sufriendo. E parlamentario ta subraya cu mester bin un accion directo di parti di gobierno pa soluciona e problemanan aki cu ta afectando e comunidad y e industria di turismo.
De Meza a enfatisa cu, maske tin un hotel den operacion y construccion cu ta nifica un gran progreso socio economico pa Pariba di nos isla, e falta di infrastructura adecuado ta un stop pa un desaroyo completo.
Falta di Infrastructura y Siguridad
Segun e parlamentario, e efeconan positivo di e hotel ta bisto cu e movecion di auto, taxi y hende den centro di San Nicolas, pero “ainda falta hopi”. Un di e puntonan di mas critico ta e estado di e careteranan cu ta conduci pa e hotel Secrets y e area di San Nicolas.
“E caretera pa bay Secrets ta den un estado hopi hopi malo. No tin iluminacion anochi, y hopi turista no kier sali anochi pasobra nan ta perde,” De Meza a splica, agregando cu e mes a presencia turistanan perdi den area di Sero Colorado pa falta di señalisacion adecuado. “E ta un lastima. Gobierno tin cu pone accion.”
Baby Beach ta perde tera: Mester di Beach Policy y Lifeguards
Un otro punto di preocupacion structural pa De Meza ta e situacion na Baby Beach. E parlamentario a revela cu estidionan ta mustra un erosion serio den e area.
Erosion di Beach: Baby Beach ta perde casi miho meter di beach pa aña door cu e toren/boca no ta full habri manera e tabata antes, locual ta causa cu e olanan ta bay cu e santo.
Falta di Plan Total: El a recorda cu for di 2016-2017 tabatin un plan total pa construi e pierenan bek pa haci e beach mas safe pa bishitante y pa scapa e beach for di e erosion, pero esaki a keda para.
Mester di Lifeguards: De Meza a presenta mocionnan den Parlamento pa urgi Ministerio di Turismo pa implementa un proyecto di lifeguards pa henter Aruba, specialmente unda tin beachnan di movecion, ya cu turismo ta nos pilar economico principal (casi 90%).
Interes General mester bay dilanti
Parlamentario De Meza a aclara cu su criticanan no ta pa bay contra su propio partido den gobierno, sino pa defende e bienestar di Aruba.
“Mi ta bisa tur ora cu e algemeen belang (interes general) mester bay riba e interes di partido. E asunto aki ta pa Aruba den su totalidad, y sigur pa e parti Pariba di nos isla, cu mester di e motor economico aki,” De Meza a conclui, haciendo un yamado urgente na Ministerio di Turismo pa aloca e fondonan necesario pa drecha e beachnan y e infrastructura di e area.