Parlamentarionan Evelyna Wever-Croes y Rocco Tjon a entrega dia 14 di juli 2026 un peticion formal na Minister Wendrick Cicilia di Turismo, Transporte y Labor, basa riba e Landsverordening openbaarheid van bestuur, LOB. Nan ta exigi pa haña tur documento relaciona cu e proyecto di maneho di sushi na Aruba unda Aruba Tourism Authority, ATA, tabata envolvi.
Segun e dos parlamentarionan, durante un reunion anterior caba nan a pidi pa bista den e documentonan. Pero te awor nan no a ricibi nada. P’esey awor nan ta hasi un apelacion formal pa gobierno habri tur e informacion.
E peticion ta enfoca riba e rol di ATA den e proyecto. Wever-Croes y Tjon ta pidi copia di tur carta, e-mail y memo unda gobierno a pidi ATA pa inicia e proyecto di sushi.
Ademas nan kier mira tur notula, acta y decision di reunionnan entre ATA y gobierno riba e tema aki. Tambe nan ta pidi pa mira e RFP-nan, “Requests for Proposals”, cu ATA lo a manda pa Serlimar y Ecotech, y tur propuesta ricibi di e companianan aki y di otro partinan envolvi.
Un punto importante ta e base huridico. E parlamentarionan ta pidi tur conseho huridico y documento unda ta evalua si ATA tin autoridad pa firma un contract cu un empresa priva pa maneho di sushi, fuera di su tareanan normal di promocion di turismo.
Nan tambe ta pidi pa mira tur raport di evaluacion, matrix di puntuacion y e decision final pa duna e proyecto na e compania cu a gana.
Den nan carta nan ta pidi pa ricibi tur documento digital, den PDF, via e sistema oficial. Si cierto parti no por sali publico, nan ta pidi pa Minister duna un splicacion pa cada documento, basa riba cua articulo di LOB e ta warda e informacion.
E parlamentarionan ta pidi tambe pa confirma ricibimento di e peticion y pa contesta dentro di e tempo legal.
E tema di sushi a bira un punto di discusion fuerte den Parlamento ultimo lunanan. Cu e peticion aki, Wever-Croes y Tjon kier trece claridad riba con e decision, seleccion y contract a tuma luga via ATA.
Te awor Minister Cicilia no a reacciona ainda.