Fundacion Contra Violencia Relacional (FCVR) ta anuncia su prome stratcollecte di aña, cu lo tuma luga durante tres diasabra: dia 27 di juni, 4 di juli y 11 di juli 2026. Meta di e campaña aki ta pa recauda un minimo di 35,000 florin pa por mantene, renoba y eleva e calidad di servicio pa victimanan di violencia relacional na Aruba.
Rish Ann Ammerlaan, Trahado Social di e fundacion, a splica cu maske nan ta ricibi subsidio di gobierno, esaki ta cubri nan gastonan structural unicamente parcialmente.
“E falta di fondo pa completa nos necesidadnan ta pone cu nos tin cu acudi na comunidad. Nos mester di e fondonan aki pa keda mantene nos shelter den un bon estado, drecha nos servicionan, y lansa proyectonan nobo pa asina brinda nos clientenan e miho calidad di apoyo posibel,” Ammerlaan a splica.
Un yamada urgente pa Voluntario
Pa logra e meta aki, FCVR ta lansa un yamada special na comunidad di Aruba pa yuda como voluntario durante e dianan di colecta. Ta busca entre 5 pa 8 voluntario pa cada horario y pa cada post strategicamente ubica na diferente rotonda rond di e isla.
E horarionan ta lo siguiente pa e tres diasabranan (27 di juni, 4 di juli y 11 di juli):
Mainta: 9:00 am – 12:00 pm
Atardi: 3:00 pm – 6:00 pm
Esnan interesa pa contribui como voluntario por inscribi mandando un mensahe di WhatsApp na +297 593-2767.
Situacion di Shelter y un preocupacion creciente pa hobennan
Actualmente, e fundacion no por ta ricibiendo cliente nobo den nan shelter temporalmente debi na e necesidad urgente pa renobacion, un situacion cu e fundacion ta considera alarmante mirando e aumento y severidad di e casonan di violencia relacional.
Ammerlaan a comparti un preocupacion grandi tocante e perfil di e clientenan cu e fundacion ta atendiendo ultimamente:
“Nos ta evaluando hopi caso di victimanan asina hoben, specialmente for di 19 aña di edad bay ariba. E ta alarmante pa mira con trauma di infancia, falta di autoestima y abandono di tata den bida di un mucha ta hiba nan den futuro to tolera situacionnan di abuso, pensando erroneamente cu esaki ta amor.”
Ora un persona drenta shelter, e no tin ningun gasto. FCVR ta cubri tur necesidad basic (manera cuminda, estadia, coriente, airco y transportacion), locual ta rekeri un fondo substancial pa opera dia a dia.
Con mas por aporta?
Pa esnan cu kier coopera pero no por ta presente na e colecta, tin diferente otro manera pa aporta financialmente:
Website: Bista fcvr.org y click riba e boton di ‘Donation’.
Cuenta Bancario: Detayes di e cuenta di banco ta disponibel riba nan pagina di Facebook.
Empresanan: Compañianan por organisa colecta interno entre colega y tuma contacto cu e fundacion pa coordina esaki.
FCVR ta gradici comunidad di Aruba di antemano pa nan cooperacion continuo pa asina hunto sigui brinda un miho calidad di bida y seguridad na esnan cu mas tin mester di dje.