Corte a pronuncia awe den dos caso di hucio sumario cu a wordo presenta contra Pais Aruba door di e verhuurders di stepnan electrico.
Riba 21 di april 2026, e minister di Husticia a anuncia cu, cu efecto inmediato, ta prohibi pa uza e stepnan riba caminda publico. Riba 29 di april 2026, un “Ultimo Aviso” di e minister a wordo publica riba social media, y riba 30 di april 2026, Pais Aruba a cuminsa carga y hiba stepnan.
E verhuurders ta pidi un prohibicion pa Pais Aruba no confisca nan stepnan. Pais Aruba no ta di acuerdo cu esey y a presenta un contrademanda. Pais Aruba kier pa e verhuurders kita tur stepnan y estacionnan di carga for di e domeingrond (esaki ta e tereno cu ta propiedad di Pais Aruba).
Corte ta dicidi den e sentencia aki cu, na e momento aki, Pais Aruba no mag di hiba e stepnan. Si Pais Aruba kier tuma medida contra e stepnan, esey mester sosode cuidadosamente y segun e forma stipula den ley. Den e caso aki, esey ta nifica manda un carta na e verhuurders, unda ta wordo anuncia cu (y dicon) segun Pais Aruba e verhuurders ta actuando contra ley, di cual ley ta trata, cual medidanan e verhuurders mester tuma y denter di cual termino nan mester haci esey. Tur esaki, Pais Aruba no a haci den e caso aki.
Ademas, Corte ta dicidi cu e verhuurders, na e momento aki no ta obliga pa kita e stepnan y stacionnan di carga for di caminda publico. Aki tambe ta conta cu Pais Aruba mester prome manda un carta na e verhuurders cu e peticion pa nan kita nan propiedadnan for di tereno di Pais Aruba dentro di un termino razonabel.
E decision aki no ta nifica cu e stepnan mag keda pa semper riba caminda publico. Naturalmente e verhuurders mester tene nan mes na e reglanan vigente, y esey ta conta tambe pa e conductornan di e stepnan. E decision di Corte solamente ta nifica cu Pais Aruba no mag di hiba e stepnan mientras cu no ta sigui e reglanan di ley.
