Diabierna mainta tabatin e prome tratamento di e caso cu a shock comunidad di Aruba. E hecho aki a sosode dia 4 di Januari dilanti Crystal Casino net pabao di e brug. Dos persona a perde nan bida den forma cruel mientras cu dos otro a keda herida mientras cu e chauffeur, Chania Fernandes Pedra a huy for di e sitio.
Awe el a presenta dilanti Huez caminda cu for di basta dia caba tin un situacion cu Ministerio Publico a rechaza e hecho cu e acusado kier usa un abogado renombra di Hulanda y akinan a surgi un discusion ya cu ora cu e abogado a presenta bisti den su paña di abogacia na Corte di Prome Instancia, el a wordo avisa cu e no por fungi como abogado de e acusado y e motibo di esaki ya caba Ministerio Publico a splica den un comunicado di prensa cual ta e motibonan.
Pero toch e abogado a drenta sala di Corte cu e bistimento ainda y akinan Huez a bise cu e mester kita esaki pasobra e no ta wordo permiti. Esaki a causa cierto tension entre Huez y e abogado y tambe familiarnan di e acusado, kende den siman a expresa nan disgusto cu e situacion aki. Den sala di corte tabata presente famianan di ambos partido afecta den e caso aki y dado momento e acusado Fernandes Pedra a haya chens pa papia y a bisa cu e ta sintie arepenti di e acto y a manera pidi disculpa na e famia di e victimanan y tambe a bisa cu e situacion ta algo cu e ta pensa riba dje cada rato di dia.
Tambe el a pidi pa huez lage sali for di KIA pa pasa e dianan cu tin prome cu tratamento oficial dine caso tuma lugar, pero akinan Huez despues di un rato a tuma decision cu e no ta bay di acuerdo pasobra e caso aki ta uno pisa caminda dos persona, kendenan tabata pareha, a perde nan bida den un solo biaha y e casi a shock comunidad di Aruba profundamente. Pa loke ta e peticion pa usa e abogado di Hulanda, huez a mustra cu e no ministerio publico por cambia e decision di Hof pa usa e abogado encuestion y cu e mester busca un otro abogado pa defende y e ora peticion tabata pa scucha un testigo pero akinan Huez a bise cu esaki lo bay keda dicidi dia 20 di Augustus awor durante e regiezetting. Pues en general e acusado ta keda sera y mas bien tur su peticionnan tambe a keda nenga of splica bon tambe dor di Huez, pakico nan a wordo nenga tambe.
Mester menciona cu ambos famia ta pasando den un trauma bastante grandi ya cu debi na irresponsabilidad di maneha auto bao influencia y velocidad halto un di e famianan a perde dos persona masha stima for di e mundo aki den un solo biaha mientras cu e otro famia tin cu biba cu nan yiu muher lo por bay haya un castigo di prison bastante pisa mirando cu e ta wordo acusa di “dood door schuld” y na un edad hoben lo mester bay sinta un castigo largo y alavez enfrenta e traumanan cu e hecho aki ta trece cune.
Asina dia 20 di Augustus awor lo bay tin e regiezieting y e tratamento mes di caso lo ta dia 2 di October. Tambe Huez a bisa e acusado cu ta su responsabilidad pa busca y presenta cu un abogado cu si ta permisibel.
Sigur un caso sumamente dificil y sin papia mes di e daño emocional cu ambos famia ta pasando aden aunke uno mas cu e otro pero asina mes dos famia ta sufriendo akinan.