Hoge Raad: condena di un ex-minister di Aruba pa estafa di Pais Aruba, soborno pasivo y malversacion ta keda vigente.**
E condena di un ex-minister di Desaroyo Teritorial, Infrastructura y Medio Ambiente (y despues di Desaroyo Teritorial, Integracion y Infrastructura) na Aruba pa complicidad den estafa di Pais Aruba, comete soborno pasivo (laga nan soborn’e) y malversacion, ta keda vigente. Esaki ta e decision di Hoge Raad awe. Esaki ta conta tambe pa e condenannan di dos co-sospechoso pa, entre otro, soborno di e minister.
E caso contra e minister
Hof (Corte Comun di Husticia) a establece e siguiente metodo di traha relaciona cu e estafa. Na nomber di personanan huridico (companianan) cu tabata den posesion di un di e co-sospechosonan (un persona liga na su partido politico), a entrega peticionnan cerca e minister pa obtene derechonan (of opcionnan) di erfpacht. E companianan aki tabata ‘bashi’ na momento di e peticion y pesey no tabatin casi ningun balor. E meta di e co-sospechoso tabata pa bende e accionnan cu un ganashi halto asina cu e opcionnan tabata duna. E rol di e minister tabata cu el a duna su acuerdo casi mesora, apesar cu tabatin atraso den e procesamento di peticionnan di tercer persona. Cu esaki, el a duna preferencia na e peticionnan di su co-sospechoso y a evita cu e peticionnan tabata wordo evalua tecnicamente segun e maneho vigente.
Ademas, e minister a acepta regalonan di su co-sospechosonan den un periodo cu e mester a dicidi riba nan peticionnan pa otorgamento di erfpacht. Esaki ta nifica soborno pasivo di un funcionario publico. Tambe e minister a uza placa di un fundacion cu tabata wordo maneha den su nomber, destina pa su campaña electoral, pa paga un biahe priva di su casa. Segun
Hof, esaki ta constitui malversacion.
Hof a condena e ex-minister na 48 luna di prizon, di cual 12 luna ta condicional. Mas leu, Hof a kita e sospechoso for di su derecho pa eherce e cargo di funcionario publico y e derecho pa wordo eligi den organonan di representacion general, ambos pa un duracion di seis aña.
Su dos co-sospechosonan a haya castigo di prizon di 30 luna (10 luna condicional) y 24 luna (12 luna condicional). Tur tres sospechoso a bay den casacion cerca Hoge Raad contra e sentencianan aki.
Kehonan di casacion
E abogadonan di e ex-minister a pidi Hoge Raad pa anula e condena. Den casacion a presenta keho riba e pruebanan pa e delitonan menciona. Entre otro, a argumenta cu e minister, como representante di Pais Aruba, mester wordo identifica cu e Pais mes, y pesey e no por a estafa e Pais. Pa loke ta e malversacion, a argumenta cu for di e pruebanan no ta resulta cu e sospechoso tabatin e check di e fundacion den su poder pa paga e biahe di su casa, ni cu e placa a wordo uza pa un meta diferente for di esun destina.
Conclusion di Abogado-General (AG)
Riba dia 3 di februari 2026, e AG a conseha Hoge Raad pa declara e kehonan di casacion aki infunda. Segun e AG, e kehonan den e casonan contra e co-sospechosonan tambe mester wordo rechasa.
Decision di Hoge Raad
Hoge Raad tambe ta di opinion cu e kehonan di casacion den tur tres caso no a logra. El a rechasa e kehonan aki sin duna un motivacion profundo, pasobra nan no por a hiba na anulacion di e sentencianan di Hof y no tabatin preguntanan huridico nobo y importante cu mester a wordo contesta.
Cu e decision aki di Hoge Raad, e condenannan y e castigunan imponi ta definitivo.