Centro di Bario Noord: “Bendiendo corchonnan pa recauda fondo comunitario”

Centro di Bario Noord ta contento di anuncia cu recientemente nos a ricibi un generoso donacion di varios corchonnan tamaño King, Queen y Double for di Hilton Hotel Aruba. E donacion aki lo yuda Centro di Bario Noord recauda fondo pa sigui realisa e hopi actividadnan, proyecto y iniciativa comunitario cu ta beneficia bario Noord y comunidad Arubiano.
Como un organizacion sin fin di lucro, Centro di Bario Noord ta depende hopi riba colaboracion y sosten di empresa, organizacion y miembro di comunidad cu ta kere den importancia di inverti den hende. Pa motibo ey, nos kier expresa nos sincero gradicimento na Hilton Hotel Aruba pa e generoso gesto y confiansa den nos mision.
Pa duna e donacion un destino util y alabes crea un entrada pa sostene nos trabounan comunitario, Centro di Bario Noord lo ta bende e corchonnan na un prijs simbolico di solamente Afl. 50 pa un.
Disponibel tin corchonnan den e siguiente tamañonan:
● King (2.01 x 1.86 cm)
● Queen (2.01 x 1.51 cm)
● Double (1.95 x 1.35 cm)
Esaki ta un oportunidad excelente pa comunidad adkiri un bon corchon na un prijs hopi accesibel, mientras cu e compra ta contribui directamente na e diferente actividadnan social, cultural, educativo y deportivo cu Centro di Bario Noord ta organisa durante henter aña.
Personanan interesa por reserva nan corchon via WhatsApp: +297 568 2935
PASA CUMPRA Y HIBA MES ORA
Ta importante pa tene cuenta cu, pa motibo di espacio limita, tur corchonnan mester wordo busca riba diasabra, 18 di juli, entre 9:30 di mainta te 12:00 di merdia, por paga cu ATM swipe diasabra mes. Desafortunadamente Centro di Bario Noord no tin e posibilidad pa warda corchonnan despues di e fecha y orario menciona.
Centro di Bario Noord ta invita tur residente di Noord y otro miembro di comunidad pa probecha di e oportunidad aki. Cu cada corchon cu wordo cumpra, bo no solamente ta obtene un producto util pa cas, pero bo tambe ta inverti den e bienestar di nos comunidad y den e diferente actividadnan cu ta fortalece union, participacion y desaroyo di nos hendenan.
Nos ta gradici tur persona, empresa y boluntario cu continuamente ta brinda nan apoyo na Centro di Bario Noord. Danki na e tipo di colaboracion aki, nos por sigui crea oportunidadnan positivo pa mucha, hoben, adulto y adulto mayor den nos comunidad.
Masha danki pa bo sosten y pa contribui hunto cu nos na sigui construi un comunidad mas fuerte y uni!
—Noord Creciendo Hunto!