Horacio Oduber Hospital (HOH) conhuntamente cu SOGA ta informa tur pashent hospeda den HOH, pero tambe bishitantenan, coleganan y alabes comunidad cu durante anochi di 20 di juli venidero te mainta trempan di 21 di juli lo tuma luga trabounan importante di reparacion na e sistema di aircondition di HOH.
Pa por haci e trabounan aki di un forma safe y responsabel, e sistema di aircondition lo wordo paga temporalmente for di 11:45 di anochi te cu aproximadamente 5or di mainta.
Nos ta compronde cu esaki por causa algun incomodidad, specialmente pa pashentnan admiti den hospital, nan famianan y tambe coleganan presente. Pa e motibo aki nos a prepara diferente medida pa limita e impacto di e reparacion aki y pa mantene tur hende lo mas comodo posibel durante e orarionan di reparacion.
E trabounan di reparacion ta necesario pa garantisa cu den futuro e sistema sigui funciona di un forma confiabel y pa sigui brinda un ambiente safe y agradabel pa tur hende cu hospeda, bishita of traha na HOH.
Di awo caba nos ta desea di pidi disculpa pa cualkier incomodidad cu esaki por causa y tambe gradici tur hende pa nan comprension, pasenshi y cooperacion mientras nos ta realisa e trabounan importante aki.