Luna di juli ta conoci mundialmente como ‘Plastic Free July’ (Juli Liber di Plastic), un iniciativa cu ta invita comunidad henter pa refleha riba e uzo excesivo di plastic y pa adopta habitonan mas sostenibel. Pa Aruba, un isla cu ta depende grandemente di e bunitesa di su recursonan natural, e esfuerso aki no ta djis un opcion, sino un necesidad urgente pa salbaguardia nos medio ambiente y, mas cu tur cos, e bida marino.
Un menasa serio pa nos lama y especie marino
Plastic ta keda un di e menasanan di mas grandi pa nos ecosistema marino mundial. Gran parti di e desperdicio di plastic cu hende ta genera ta termina den lama, afectando directamente rifnan di coral y e fauna marino. Bestianan manera turtuga, delfin, pisca y parhanan di lama sa confundi plastic cu cuminda, locual ta resulta fatal pa nan salud. Ademas, e plastic aki cu tempo ta desintegra y comberti den ‘microplastic’, asina plastic ta drentando e cadena di consumo y afectando indirectamente nos salud.
Leynan di Aruba: Prohibicion di plastic di un solo uzo
Como parti di e compromiso pa proteha nos medio ambiente, Aruba tin na vigor e ley cu ta prescribi e prohibicion di uzo di plastic di un solo uzo (single-use plastics), den e Landsverordening verbod voor het milieu schadelijke producten. Esaki ta inclui articulonan manera tayo, forki, cuchara, straw, confetti di plastic (stroichi), blaas y baki di cuminda traha di plastic of styrofoam.
E ley aki t’ey pa un rason: pa reduci y preveni e cantidad di desperdicio di plastic cu ta genera diariamente riba nos isla. Pa por logra un cambio real, cumplimento di parti di comercio, sector di turismo y nos ciudadanonan ta crucial. E ley ta duna nos e cuadro legal, pero e accion diario ta keda na cada persona pa e ta efectivo.
Con abo por contribui na e luna di ‘Juli Liber di Plastic’ aki (y structuralmente)?
‘Plastic Free July’ ta e momento ideal pa nos re-evalua nos consumo diario. Djis algun cambio chikito por haci un impacto grandi:
Uza productonan reusabel: Semper tin bo boter di awa resusabel y tas di compras cu por bolbe uza.
Nenga plastic di un solo uzo: Ora bo ta cumpra cuminda of bebida, bisa “no” na straw, forki y cuchara di plastic of saconan innecesario.
Sostene comerciantenan cu ta haci practica sostenibel: Opta pa cumpra cerca negoshinan local cu activamente ta uza alternativa ecologico y ta respeta e ley di prohibicion.
Un esfuerso colectivo- Dia Nacional pa Cuida Aruba-25 di juli 2026
E lucha contra consumo di plastic no ta e tarea di un solo departamento of algun instancia, sino un esfuerso colectivo di henter e comunidad di Aruba. Por ehempel, Gobierno di Aruba ta organisando un Dia Nacional pa Cuida Aruba, riba dia 25 di juli venidero, e dia aki ta muestra di accion colectivo unda Aruba henter ta haci limpi tur skina di nos isla. Ademas e dia nacional pa un Aruba limpi mester yuda conscientisa nos hendenan pa preveni cu ta sigui tira sushi of laga sushi atras. DNM ta spera cu e Dia Nacional pa Cuida Aruba sirbi como compromiso pa un Aruba mas limpi y saludabel pa e generacion presente y esun di futuro.