Den un declaracion reciento, Minister Rene Herde a comparti e vision y e cambionan structural cu mester tuma bugar den e departamento tecnico di Dienst Openbare Werken (DOW) pa loke ta trata construccion y mantencion di caminda na Aruba. Siguiento e experencia y e trabounannan realisa na Caya Grandi na Playa, e mandatario a enfatisa cu structuralmente mester cambia e manera di diseña y ehecuta proyectonan di infrastructura.
Integracion di acera y rioolering den e sistema di diseño
Minister Herdé a splica cu den pasado, e creacion di acera, bajada di auto y sistemanan di awa pa no para ora di yobida no tabata wordo mira como un parti integral y automatico den e sistema di traha caya.
“E mester bira structural. E anchura, e tipo di material cu bo ta usa riba e acera, e posibilidad di un bajada for di acera pa connecta un caya cu un otro, y specialmente e facilidad pa ora awa yobe pa e awa no para; tur esakinan mester ta hinca den nos sistema ora di diseña un caya,” e mandatario a duna di conose.
Awor, DOW tin e encargo pa aplica e normanan aki den nan planificacion, maske esaki ta nifica un aumento den e costo di e proyectonan.
Inversion mas halto pa un calidad superior
E minister a reconose abiertamente cu upgrade e calidad di nos cayanan ta bini cu un costo mas halto. Mientrastanto cu djis basha un capa di asphalt tin un prijs fiho pa kilometer, un trabou completo ta rekeri hopi mas presupuesto.
Fundeshi fuerte: Pa garantisa durabilidad.
Acera di klinker: Pa un miho bista y facilidad pa peaton.
Rioolering debido: Pa evita cu awa ta keda para y ta daña e asphalt.
Detayenan urbano: Includiendo e idea di pone banki canto di asphalt pa e ciudadanonan.
Debi cu e prijsnan di materialnan structural a subi, e minister a señala cu e unico manera pa ofrece e calidad aki ta door di destina mas recurso financiero den presupuesto di Gobierno y Parlamento.
Strategia di ‘Bario pa Bario’
Pa maximisa e impacto di e fondonan, Minister Herdé ta propone un modelo di trabou caminda ta aborda un bario completo prome cu pasa pa e siguiente.
“E ta un bario defini, e no ta structuralmente grandi, pero e idea ta pa ora drenta eyden, bo ta drecha e cayanan, bo ta traha e acera, bo ta cambia e luznan publico, y ora bo caba, e bario ta completamente cla. Despues bo ta pasa pa e siguiente.”
Un reto financiero structural
E minister a conclui cu e discusion actual den seno di DOW y gobierno no ta un di pleito, sino un di estrategia: con pa scohe miho caminda pa inverti. Cu e recurso y placanan limita cu tin, e meta ta pa haci e trabounan mas eficiente posibel, caminda structuralmente ta hinka mas placa den infrastructura pa asina garantisa un Aruba cu cayanan mas sigur y barionan digno pa tur ciudadano.