Den Renaissance Convention Center a tuma luga e graduacion di e alumnonan di zesde klas di Colegio Santa Filomena na San Nicolas.
E anochi, cu e tema “Retro Disco”, tawata bunita y anima pa meneer Addonsito Croes. Musica tawata di miniteca Genie. Cada alumno a ricibi como regalo, apart di nan certificado, un bunita recuerdo di nan scol.
Despues di a saboria un dushi plato di hotel, e alumnonan di klas 6 a presenta nan bailenan pa e publico.
Na nomber di e team di Colegio Santa Filomena, cabesante Mario Nooijen y maestro Elseline Ruiz-Hirschfeld a gradici cada mayor y alumno deseando nan tur exito di mundo na scol secundario. Tambe cabesante Mario Nooijen a entrega na cada maestro di e scol, un rosa como gradicimento pa nan labor di e aña aki.
