Sindicato FTA, pa medio di su vocero Hose Figaroa, ta lansa un yamada fuerte na autoridadnan pa introduci regulacion riba corto plaso den e sector di vacation rentals na Aruba. Mientras cu e sector aki ta duna un impulso na cierto areanan di nos economia, su crecemento descontrola ta build up un presion insostenibel riba e mercado di vivienda pa e propio Rubiano.
Segun un informe elabora algun aña pasa na Hulanda, e cantidad di cambra den e sector di vacation rentals na Aruba a surpasa e cantidad di cambra di hotel. E falta di regulacion ta haci cu e sector aki ta sigui crece sin freno, treciendo consecuencianan serio pa e comunidad local.
Un Balance Economico cu un Costo Social Halto
Figaroa ta splica cu FTA no ta boga pa elimina e sector di vacation rentals, ya cu e ta beneficia negosho- y restorantnan fuera di e hotelnan, como tambe supermercado y companianan di maneho. Sinembargo, e falta di control tin un efecto directo y negativo riba e bida di nos ciudadanonan: Preis exorbitant di cas: Inversionistanan di exterior ta cumpra propiedadnan na Aruba no pa biba aden, sino como un negosho. Esaki ta pusha e balor di taxacion y e preis di benta na nivela- y sumanan impasabel pa e local.
Mercado di huur a drenta crisis: Hopi doño di cas ta opta pa huur pa dia na turista en bes di huur pa luna na localnan, debi cu e ganashi ta substancialmente mas halto. Esaki ta reduci e disponibilidad di cas pa huur y ta aumenta e prijsnan dramaticamente.
Fuga di talento (Brain Drain): Aruba kier atrai su profesionalnan structuralmente bek for di exterior, pero ora nan yega, nan ta topa cu un mercado caminda un cas pagabel pa biba aden ta inexistente.
Regulacion: Un Necesidad Inmediato
E sector hotelero na Aruba ta den un forma husto regula, permitiendo un miho control riba su crecemento y e cantidad di cambra. FTA ta enfatisa cu e mesun nivel di control y regulacion mester wordo aplica na e sector di vacation rentals.
“Nos mester di regulacion riba corto plaso. No pa mata e sector, pasobra el a demostra di tin su balor, sino pa domina e crecemento aki y frena e aumento den prijs di vivienda. Casnan na Aruba mester keda accesibel pa hende biba aden, no djis pa haci negoshi cun’esaki.” Hose Figaroa, FTA
FTA ta conclui cu si no actua awor structuralmente, nos ta core risico di pusha nos propio habitantenan afo di nan mesun mercado di cas, afectando e bienestar social di e pais.
