Fraccion di AVP a participa na e ceremonia oficial di conmemoracion di Dia di Emancipacion, un momento di gran significado nacional pa recorda un capitulo importante di nos historia y reflexiona riba e balornan fundamental di libertad, dignidad humano, respet y igualdad. Presente tabata parlamentarionan Otami Thomasia, Stephany Sevinger, Jennifer Arends-Reyes, Clifford Heyliger y Carlos Bermudez.
Dia di Emancipacion ta invita nos no solamente pa wak bek riba un periodo doloroso den nos historia, sino tambe pa honra e lucha, resiliencia y fortaleza di tur esunnnan cu a enfrenta opresion, sclavitud y inhusticia. E ta un ocasion pa mantene nan memoria bibo y reafirma nos compromiso cu un sociedad caminda cada persona ta wordo trata cu respet y tin igualdad di oportunidad.
Fraccion AVP ta expresa su orguyo cu, for di e aña aki, 1 di juli oficialmente ta forma parti di e dianan nacional di Aruba. E reconocemento aki ta representa un paso historico den e balorizacion di e significado profundo cu Dia di Emancipacion tin pa nos pueblo, nos identidad y nos desaroyo como nacion.
Segun Fraccion AVP, e conmemoracion aki no ta limita su mes na recorda pasado. E ta un yamada pa tur miembro di nos comunidad pa sigui siña di nos historia y pa permanece alerta contra tur forma di discriminacion, desigualdad y exclusion. Solamente door di reconoce y compronde nos pasado, nos por sigui fortalece e fundeshi di un sociedad mas husto y inclusivo.
Fraccion AVP ta reafirma su compromiso pa sigui traha pa un Aruba caminda libertad, dignidad humano, respet y igualdad no ta solamente balornan celebra un dia pa aña, sino principionan cu ta guia nos decisionnan y accionnan diariamente.
Recordando nos pasado, nos ta fortalece nos presente y construi un futuro mas husto y digno pa e generacionnan cu ta bin.
