2
Prome Minister Mike Eman a continua diasabra mainta ta verf y embeyece e casnan den Bernhardstraat na San Nicolas. Cu apoyo di mas cu 12 boluntario, un grupo a completa e transformacion di dos cas mas. E cas di Merida Torres na Bernhardstraat #187 a haya un color berde nobo, mientras cu e cas di Marcia Guillen y su ruman Tirla Guillen-Lopez na Bernhardstraat #189 a wordo geverf color paars cu fucsia, asina dunando e casnan un apariencia fresco y yen di bida.
Cada siman e iniciativa ta sigui crece. Loke a cuminsa como un proyecto pa revitalisa e casnan, awor a bira un berdadero movecion comunitario, unda boluntario, comercio y habitante ta trahando hunto pa duna Bernhardstraat un bista nobo y fortalece e orguyo den e bario. E cambio ta sigui hala atencion di tur hende cu ta pasa den e area. E habitantenan, e bishitantenan y turista ta para pa aprecia e resultado di e trabounan, felicita e boluntarionan y expresa nan apoyo pa e iniciativa. E reaccionnan positivo aki ta motiva e grupo pa sigui traha y ta confirma cu comunidad ta aprecia e esfuerso cu ta haci.
Famia contento di mira nan cas bunita bek
Marcia Guillen, cu ta biba hunto cu su ruman Tirla Guillen Lopez na Bernhardstraat #189, a expresa su emocion ora cu nan cas y dak a haya un color nobo. “Mi ta hopi agradeci. Nan a verf nos cas y nos dak. Masha danki na tur hende cu a yuda. Mi ta hopi feliz,” el a comenta.
Prome Minister Mike Eman a expresa su satisfaccion cu e entusiasmo cu e iniciativa ta sigui genera den comunidad. Segun Eman, cada cas cu ta verf ta representa hopi mas cu un capa nobo di verf; ta un muestra di solidaridad, colaboracion y compromiso cu San Nicolas. El a destaca cu e apoyo cu e iniciativa ta ricibi di boluntario y comercio ta mustra cu, ora cu comunidad traha hunto, por logra cambio positivo cu ta beneficia henter e bario.
Comercio ta solidario pa yuda verf Bernhardstraat
E proyecto ta sigui atrae sosten di diferente compania. Total Service Aruba a uni na e iniciativa y a tuma over e trabou di verf e daknan di e casnan. Aunke e daknan ta traha di zink, nan tambe a haya un capa nobo di verf pa completa e transformacion di e casnan. Lucas Geerman, hoben kende ta traha cu Total Service Aruba, a expresa su orguyo pa por contribui na e iniciativa door di ta encarga e trabou di verf e daknan. Segun Geerman, e proyecto ta mustra cu comercio tambe por haci un diferencia den comunidad. El a invita tur pueblo di Aruba pa participa den e Dia Nacional pa Cuida Aruba dia 25 di juli y a enfatisa cu solamente cu participacion di tur ciudadano nos por sigui construi un Aruba mas limpi y mas bunita.
Durante e verfmento diasabra mainta, Prome Minister Mike Eman a ricibi varios bishita di persona cu a acudi personalmente pa expresa nan aprecio pa e iniciativa y pa e dedicacion di tur e boluntario cu ta contribuyendo na e renobacion di Bernhardstraat. Entre nan tabatin Alipio Jimenez, miho conoci como “The Coconut Man”, cu diariamente ta ofrece awa fresco di coco na e turistanan na entrada di Colony. Como muestra di su aprecio, Alipio a ofrece Prome Minister Mike Eman y e boluntarionan awa fresco di coco. Cu un sonrisa el a bisa: “Pasobra nan merese esey.” E gesto simpel pero significativo a refleha e aprecio cu hopi miembro di comunidad ta sinti pa e esfuerso cu nan ta haci.
Purcy Wirth, di Ba-We Construction & Cleaning, tambe ta sigui activamente envolvi den e proyecto hunto cu su team. Cu e colaboracion constante di boluntario, comercio y diferente otro miembro di comunidad, e grupo a bira un berdadero famia cu un meta comun: embeyece Bernhardstraat y duna San Nicolas e atencion cu e merece.
Ban sigui cuida Aruba
Mientras e trabounan di verf tabata sigui, boluntarionan tambe a parti flyer di e campaña “Dia Nacional pa Cuida Aruba” na automobilista cu tabata pasando den bisindario. Cu esaki nan a invita tur ciudadano pa participa den e gran accion nacional di limpiesa cu lo tuma luga dia 25 di juli, resaltando cu un Aruba mas bunita no ta logra solamente cu verf, sino tambe cu un compromiso comparti pa cuida nos isla. E proyecto pa embeyece Bernhardstraat ta sigui tur diasabra, y tur persona cu ke aporta ta bon bin pa uni na e grupo di boluntario.
Prome Minister Mike Eman a enfatisa cu e iniciativa ta mustra cu no ta necesario pa bo ta doño di un cas pa haci un diferencia. Duna un man pa verf un cas y yuda un otro famia sinti orguyoso di nan hogar ta un acto di amor pa comunidad. E sonrisa, gratitud y emocion di e habitantenan ta e recompensa mas grandi pa tur esun cu ta participa. Stap pa stap, cas pa cas, Bernhardstraat ta recupera su briyo. Y cu cada boluntario cu ta uni, San Nicolas ta sigui confirma cu unidad, compromiso y solidaridad ta e base pa construi un comunidad mas fuerte y un Aruba cu nos tur por sinti nos mes orguyoso di dje.
