Curacao: E Barku di Marina Hulandes Zr.Ms. Tromp riba Djaluna 26 ougùstùs próksimo lo mara na Willemstad. Ta 12 aña pasá ku e fragata di komando i defensa aéreo tabata na Willemstad pa un bishita den waf. Ta e último waf ku e barku di Marina ta bishita promé ku e bolbe bek kas despues di kasi 6 luna.
Djaluna 26 di ougùstùs próksimo, públiko por mira e entrada seremonial di Zr.Ms. Tromp for di 09.30 di mainta na Bahia di Santa Ana. Aki Zr.Ms. Tromp lo dispará 21 tiru di saludo na honor di e bandera di Reino i Gobernador di Kòrsou. E saludo aki lo keda kontestá ku 21 disparo di saludo desde Fòrti Krommelijn, despues di kua e barku lo nabegá drenta Bahia di Santa Ana i lo dispará un biaha mas 21 tiru di saludo.
Pacific Archer
E biahe ku a dura seis luna, ku e nòmber Pacific Archer, ta den e lus di desaroyo di seguridat i stabilidat den Oséano Pasífiko, fortalesimentu di koperashon internashonal, promoshon di siguridat marítimo i e apoyo di kumplimentu ku e leinan i regulashonnan internashonal riba laman. Durante e biahe aki e barku di Marina a traha den estrecho kolaborashon ku aliado i sosionan i a partisipá den vários ehersisio internashonal, inkluyendo e ehersisio marítimo mas grandi RIMPAC na Hawaï. Ademas di ehersisionan e barku a keda tambe desplegá na un paso liber na Laman di China Sur, i den e Bab-El-Mandeb, kontra di atakenan di parti di Houthi. E biaha e kuminsá na Den Helder, atrabes di Laman Mediteráneo nan a nabegá bai Pasífiko Indio i atrabes di region Karibe e barku lo bai bek direkshon kas.
Zr.Ms. Tromp
Zr.Ms. Tromp ta un di e kuater fragatanan di komando i defensa aéreo di Marina Real. Ademas di e 200 miembronan di tripulashon na bordo tambe tin un helikòpter NH-90. E barku di Marina ta ekipá ku sistemanan avansá di radar i arma. Di e forma aki e barku ta kapas pa rekonosé menasanan aéreo, pa sigui esakinan i neutralisá nan, i ku esaki e ta hunga un ròl krusial den e tareanan di defensa aéreo di Marina.
