Diasabra ultimo a tuma luga na Den Haag Hulanda e Nederlandse Kampioenschappen. Jourde y Zahyon Klaber a participa representando e scol di Taekwondo di Henk Meijer. Jourde Klaber a perde su prome pelea y por a bay bisti paña pa despues wak su ruman chikito bringa. Jourde Klaber tabata hopi desapunta, pasobra la perde su pelea pa 1 punto. Mundo no a caba ainda pa Jourde Klaber, pasobra e mester bay traha mas duro pa e Santo Domingo Open na luna di Maart. Zahyon Klaber tabata den un poule di 7 atleta y Zahyon Klaber su prome pelea tabata contra di Caner Sucuoglu y Zahyon a gana esaki cu un score di 22-6. Zahyon su siguiente pelea a bay contra di Zakaria Benziane y Zahyon a gana esaki cu un score di 24-4. Den final Zahyon Klaber a topa cu Ted Brilhuis di e scol di Taekwondo Oude Luttikhuis y e pelea aki a hala hopi atencion di e publico cu a rondona veld 1 completamente pa mira e final aki y Zahyon Klaber a gana esaki cu un score di 19-17. Henk Meijer tin hopi aña caba ta guia e team di Brazil Taekwondo Stichting y ta hopi contento cu e logro aki. Henk Meijer su scol a logra dos prome lugar den e Nederlandse Kampioenschappen. Zahyon Klaber ta e tercer persona di Aruba cu a logra gana Nederlandsche Kampioenschappen. Rudy Wong-Fat ta e prome cu a sali campeon di Hulanda varios biaha den e añanan ’70 pa ’80. Rudy Wong-Fat a logra sali campeon di Europa den aña ’80 tambe. Alberto Klaber tata di Jourde y Zahyon Klaber a sali varios biaha campeon di Hulanda den añanan ’86-’92 representando Hulanda. Alberto Klaber a logra medaya di brons den e campeonato Europeo den aña ’90. Brazil Taekwondo Stichting ta contento cu e logro di Zahyon Klaber cu a demonstra su habilidad. Awo lo sigui cu training den preparacion pa e clasificacion pa e Pan Americano na Santo Domingo y Henk Meijer ta bay ta na Aruba na luna di Februari pa cuminsa cu e preparacion. Awe nochi 6:50 e rumannan Klaber ta yega for di Hulanda. Brazil Taekwondo Stichting ta haci un invitacion na tur hende pa bay aeropuerto y ricibi nos heroenan.