Fin di aña ta cerca y ya caba nos ta scucha tur caminda cu ayacanan ta bay wordo traha, of e famoso ham di pasco ta bay wordo horna. Hopi di e cumindanan aki ta wordo haci, pero no solamente pa consumo domestico, sino nan ta wordo bendi. Tin hopi otro sorto di cuminda cu ta bay wordo prepara
Yvette Geerman, di e Departamento di Higiena, a enfatisa pa regla e carchi berde di salud, si tin pensa di bay bende cuminda na cas. Consehabel ta cu tur esnan cu ta den mundo di cuminda pa percura pa nan tin nan carchi di salud y wak pa e ta na ordo. Tanto pa restaurant como tambe esnan cu ta na cas, ta consehabel. Esaki ta un siguridad pa abo mes y e consumidornan, e clientenan cu ta bin cerca bo. Bo ta duna nan un garantia cu bo ta liber di bacteria di algo cu por bay robes.
Den mundo di cuminda tin un riesgo hopi grandi. Cualkier momento tin cosnan cu por bay robes y abo mes como e persona cu ta prepara e cuminda, pa bo mes siguridad y pa bo por garantisa e consumidor, bay saca bo carchi di salud. Ya bo tin un garantia cu e proceso cu bo ta haci, cu bo no ta un cargado di bacteria cu por pase over. Fuera di e carchi di salud, tin cu tene cuenta cu food safety. E ta wordo yama e cinco yabinan. E reglanan basico cu ta higiena, cu tin cu corda semper cu e limpiesa ta importante, e labamento di man, pone atencion riba dje. E momento ora cu ta prepara e cuminda, corda di separa cumindanan curu, for di alimentonan ya cushina caba. Corda riba bo temperatura. Corda cu Aruba ta hopi calor, specialmente den e dianan aki. Mas calor e ta, bacteria ta multiplica hopi mas lihe. Corda riba e calidad di cuminda cu bo ta uza. Wak e producto su fecha di vencimento. Awor aki controla ora cu ta bay cumpra e producto den supermercado of unda cu ta, si e fecha di vencemento ta cumpli y si no ta mucho cerca.
E consumidornan, nan tin cu warda riba un tiki mas den December, pa haci compras. Awor aki ta haci’e tempran y tin chens pa ora cu December, e fechanan a yega su vencemento of e calidad a bay atras. Ban bira mas critico nos mes y no cumpra den gran cantidad, cumpra loke bo tin mester, segun Geerman.