“Yuda Nos Yuda esnan den comunidad cu ta den necesidad”

2 di november lo rifa un auto Hyundai Eon 2019 pa solamente 5 florin!

Aruba One Happy Island Lions Club” a wordo lanta na aña 2017. Club di Leonnan ta e organisacion di servicio na comunidad mas grandi na mundo. E meta principal ta pa duna servicio na nos comunidad cu ta den necesidad como tambe concientiza y educa riba topiconan pa promove un comunidad sano cu un bida digno. Desde su fundacion Aruba One Happy Island Lions Club a realiza projectonan na bienestar di nos comunidad manera e.o. “Beach clean-up” na Plastic beach, Projecto di Planta Mata den Parke Arikok, Boluntario den Simulacro organisa pa Bureau Rampenbestrijding Aruba, Paranda di Bochincha pa nos personanan special, Projectonan hunto cu Aruba Doet, Blood Donor Drive, Caminata den Naturalesa y Donacion na Organisacion Deportivo. Ademas di e proyectonan menciona Aruba One Happy Island Lions Club ta organisa y promove diferente campaña di concientizacion den nos comunidad manera  ‘Ban Tene Aruba Limpi’, ‘Trafico Conciente’, ‘Conservacion di Mangelnan’, ‘Dia di Paz’. Tambe a organisa varios charla e.o. riba e tema di Medio Ambiente, Servicio Boluntario y Comunitario, Malesa di Diabetes y Presion, Lecturanan riba Concientizacion pa un Trafico Sigur pa Cuerpo Policial; Fundacion Zinnia; FADA y Fundashon Ban Uni Man Pa Cria Nos Muchanan. E projectonan aki y mas a wordo realisa cu sosten di e comunidad y comercio di Aruba. E aña Leonistico nobo, e club tin hopi reto su dilanti pa asina cumpli cu e necesidad y demanda di nos comunidad local y e programa di Club di Leonnan Internacional. Riba programa tin diferente projectonan prepara riba e tereno di Diabetes, Visual,  Combati Hamber, Medio Ambiente, Cancer di Mucha y Trafico Sigur. Pa por cumpli cu esaki Aruba One Happy Island Lions Club ta recauda fondo e lunanan nos dilanti pa medio di un rifa, cu solamente 5 florin pa ticket bo por gana como prome premio un auto Hyundai Eon 2019 nobo, segundo premio un Estadia di un fin di Siman na un hotel local y tercer lugar un ticket pa 4 persona por disfruta un dia riba De Palm Island. E sorteo lo tuma luga dia 2 di november 2019 pa 8 ‘or di anochi durante un evento na Centro di Bario Tanki Lender. Cu e fondo recauda nos club por sigui realiza projectonan na bienestar di nos comunidad, Un apelacion na henter comunidad na Aruba pa yuda nos yuda esnan den comunidad cu ta den necesidad. Pa ticket por acerca nos miembronan y rebendedornan di Aruba One Happy Island Lions Club kendenan lo ta na diferente punto strategico di nos pais bendiendo e ticketnan di e rifa. Pa buki di rifa por tuma contacto na number 594-0043 of 746-0428.

 

Comments

comments