TECNOLOGIA
Mayoria mayor ta sintinan mes comodo pa laga nan yiunan wak YouTubeKids, un version apto pa mucha di e plataforma di video.
Pero videonan perturbador haya recientemente ariba e plataforma door di algun mama, ta mustra cu e plataforma di red social toch no ta un luga sigur pa mucha.
Un mama di Florida a bisa cu el a haya videonan ariba YouTube y YouTube Kids cu ta duna mucha instruccion con pa comete suicidio.
Free Hess a bisa cu el a wak e video na Juli ultimo ora cu’n otro mama a alert’e ariba esaki na momento cu e cu su yiu homber tabata wak cartoon ariba YouTubeKids. Mei mei di un videonan a aparece un video di un homber cu bril di solo splicando muchanan con pa corta nan pols.
Hess, un pediatra, a haci un yamada na diferente gruponan pa raporta e video pa asina e wordo kita for di e plataforma. Segun Hess, YouTubeKids a dura un siman prome cu nan a kita e video.
SHOCK
Pero e luna aki el a wak’e atrobe, e biaha aki ariba YouTube. Un biaha mas, e video aki ta wordo raporta dor di Hess y otronan, y YouTube ta dura algun dia prome cu e retira e video aki. Hess a bin ta skirbiendo tocante e problema aki den su blog parental.
“Esaki ta dunami rabia, tristesa y frustracion”, Hess a bisa na CNN. “Mi ta un pediatra, y mas y mas mi ta wak muchanan bin cu autolesion y intento di suicidio. Mi no tin duda di cu rednan social y cosnan manera esaki ta contribuyendo na esaki”.
Pero esey no ta tur. Ora cu Hess a bay ariba YouTube Kids y a cuminsa explora e sitio, loke el a wak a lag’e den shock. E ta bisa di a haya videonan cu ta glorifica no solamente suicidio pero tambe explotacion sexual y abuso, traficacion humano, violencia arma y violencia domestico. Un video, inspira ariba e popular videogame “Minecraft” video game, incluso tabata describi un tiroteo escolar.
“Tabata tin asina tanto, cu mi mester a stop di graba”, Hess a bisa.
Hess kier pa YouTube haci un miho trabao pa screen videonan cu ta destina pa YouTubeKids. E ta bisa di ta compronde cu Google (doño di YouTube) ta un negoshi y “nan no tin e mesun metanan cu ami tin, pero mi kier pa nan haci un miho trabao ora cu nan videonan ta wordo raporta como ofensivo, y mi kier pa esakinan wordo retira di biaha ora cu nan wordo raporta”.
Den respuesta na e acusacionnan di Hess, YouTube a bisa den un comunicado cu nan ta traha pa haci e videonan ariba YouTube Kids uno familiar y ta tuma feedbacknan na serio.
“Nos ta aprecia cu e publico ta trece contenidonan problematico na nos atencion, y nos ta haci’e posibel pa tur hende por raporta un video”, e comunicado a bisa. “Videonan cu wordo raporta ta wordo revisa manualmente 24/7 y cualkier video cu no ta pertenece den e aplicacion ta wordo kita. Nos a bin ta inverti tambe den sistemanan nobo di control pa mayornan, incluyendo e habilidad di selecciona video y canalnan den e aplicacion. Nos ta mehorando nos sistemanan y ta reconoce cu ainda nos tin un caminda largo nos dilanti”.
Mas control di parti di mayornan
Hess a bisa cu YouTube ta mas lihe den baha videonan cuestionabel for di YouTubeKids cu YouTube normal. Pero e ta kere cu pa ora un hende por a bati alarma, ya e video por a causa daño caba.
“Manera cu un hende reporta un video, e ta laat, pasobra cu ya un mucha a wak e video caba”, el a bisa.
Hess kier tambe pa mayornan ta mas consciente di kico nan yiunan ta wak ariba YouTube y YouTube Kids, y en general, pa mayornan haci un miho trabao pa keda al tanto cu tecnologia.
“Tin un desconexion entre kico e mucha di tecnologia y kico nan mayornan sa ya cu e mayornan no a crece cu tecnologia”, el a bisa. “Muchanan ta nativonan digital y e mayornan ta inmigrantenan digital”.
Mas importante, el a bisa, mayornan mester uni un cu otro pa combati e problema aki.
“Nos mester resolve esaki”, Hess a bisa, “y nos tur hunto mester resolve esaki”.