Aruba Tourism Authority (A.T.A.) un biaha mas ta organisa evento YOU Celebration, un celebracion hubilario cu ta ser considera como un tradicion valioso pa e organisacion. YOU Celebration ta un programa cu ta rindi homenaje y ta demostra aprecio y respet pa e dedicacion, trabou, principio, norma y balornan cu e ekipo ta carga tur dia den e mundo laboral na A.T.A.
E aña aki, cu topico di arte, YOU Celebration a habri e museo di pintura pa asina reconoce diesun hubilario di e anochi aki cu un canvas personalisa. Miembronan di ekipo cu a contribui grandemente na e organisacion, cu abase di nan expertisio a yuda forma y construi un legado segun resiliencia, conocemento, lealtad y profesionalismo. Ta para keto riba e hecho cu ta celebra un acumulacion di shen y cuarenta aña di servicio entre e diesun miembronan di ekipo.
Cu un dedicacion valioso, A.T.A. ta reconoce cu cada miembro di ekipo ta un canvas di colaboracion unda ta incorpora e balornan y principionan di e organisacion segun aportacion unico, talento, creatividad y precision.
Nos ta honra e siguiente miembronan di ekipo; Theresita Chai Marketing Executive – 35 aña di servicio, Archangel Croes Trade Relations Liaison – 5 aña di servicio, Melissa Kock Accounting Assistant – 10 aña di servicio, Rayon Koolman Digital Specialist – 20 aña di servicio, Naomi Korsen Croes Financial Controller – 10 aña di servicio, Lindelia Maduro Valencia Cleaner/ Messenger – 10 aña di servicio, Paula Ochoa Trade Relations Liaison – 20 aña di servicio, Raul Piar HR Officer – 10 aña di servicio, Edmar Rincones Financial Analyst – 5 aña di servicio, Mayra Tromp Digital Customer Experience Specialist – 5 aña di servicio, Maas van Drie Chief Financial Officer – 10 aña di servicio.
‘Cada miembro di nos ekipo ta mas cu solamente un empleado pa nos, nan ta parti di e historia di A.T.A., cada un tin su propio lugar den e historia cu nan a yuda crea. Sea cu ta 5 aniversario of 35 aniversario, cada aña di experiencia a contribui pa trece un balor inigual na nos ekipo y na nos isla. Nos ta gradici nan pa e manera den cual nan a nutri y inspira nos canvas di A.T.A.’ Ronella Croes CEO di A.T.A. a menciona.
A.T.A. un biaha mas ta gradici cada un di e miembronan di ekipo cu ta a sigui crea un legado y ta sigui yuda marca un historia den nan trayectoria profesional den e industria di turismo.
