YMCA Aruba ta trahando riba e proyecto di Feria Social hunto cu ayudo di studiantenan di Movecion y Salud di IPA. Movecion y Salud ta un estudio cu ta forma maestro cualifica pa duna les riba tereno di movecion y salud na Scol Primario. YMCA a pidi ayudo di IPA pa colabora cu nan programa di sport y actividadnan na YMCA durante nan Afterschool program pero tambe pa e miembronan. Cu esaki ta trahando for di mas o menos 6 siman pasa caba, den nan tempo liber, den cual studiantenan a bishita YMCA pa observa e situacion y analisa unda por yuda. A cuminsa cu un draaiboek cu werkplan pa 25 actividad pafo y 25 actividad paden. E contenido di e draaiboek ta varia den e grupo di San Nicolas y e grupo di Dakota.
“Nos a split nan pasobra net e situacion na San Nicolas ta un tiki diferente cu na Dakota”, asina Marina Jones a señala. YMCA kier actividadnan deportivo innovativo pa asina atrae mas miembro nobo na YMCA. Marina Jones a gradici IPA, principalmente e departamento di Movecion y Salud como tambe Setar NV cu ta un di nan sponsornan y tambe CEDE Aruba.
Rachel Croes, Director di YMCA, a agrega cu YMCA ta traha cu part-timer y nan no ta alcansa pa crea programanan nobo y inovativo ariba e area deportivo. Aunke nan ta ocupa caba cu programanan deportivo, nan kier keda innovativo. Pa e motibo aki YMCA a acerca Movecion y Salud di IPA ya cu nan tin e experticio riba e tereno aki. Movecion y Salud a yuda cu esaki y nan proyecto di Feria Social 2016. Lo traha cu un draaiboek cual tin como meta pa facilita e trabou di e Youth Workers y pa e muchanan yega YMCA cu hopi animo y bay cas cu un smile, Croes a expresa. Ta bezig cu e parti di presupuesto pa e materialnan cu mester cumpra.
Ta gradici Setar NV, cual ta e compania cu pa di dos aña sigui ta sponsor YMCA pa e evento di Feria Social. Danki na CEDE Aruba cu ta yuda guia nan durante e proceso, Rachel Croes a indica. “Nos ta manda un palabra di danki pasobra sin e proyecto aki, e oportunidadnan aki nos no lo tabatin aworaki”, e director di YMCA a finalisa bisando.
Young Men’s Christian Association (YMCA) ta funda dia 6 di juni 1844 dor di George Williams na London, Inglatera. Su oficina principal ta na Geneve, na Suisa. Mas di 57 miyon hende ta beneficia di e asociacion estableci den 125 pais rond mundo. E lema principal di e organisacion internacional ta empodera hendenan hoben. Bob Steele a funda YMCA Aruba 60 aña pasa dor di e necesidad pa bin cu un luga pa hobennan pa evita cu nan lo ta riba caya. YMCA tin como meta pa crea personanan util y habil den nos comunidad pa medio di brinda guia y motivacion, pa asina nan ta un influencia positivo ariba nan contemporaneonan.
YMCA ta ofrece diferente actividadnan manera campamento pa mucha, campamento pa hoben, recreacion deportivo manera p.e. volleyball y basketball y otro deporte, como tambe eventonan social. YMCA a cuminsa cu e prome “Tra’i merdia”, yama Y’s Care cu a cuminsa na Aruba 24 aña pasa cu un programa di asistencia cu huiswerk y recreo.