YMCA ta un organisacion hopi bunita, mirando cu nan ta non profit, tin poco empleado. Tin biaha hende ta kere, mirando cu e edificio den exterior, ta uno grandi y ta kere cu tin hopi hende yudando. YMCA tin un team basta chikito cu ta tene nan mes riba un base diario hopi fuerte y ta traha a base diario pa make it happen pa mucha y hoben. Nan ta bunita den e sentido cu nan ta yudando e mucha y e hoben su desaroyo den comunidad y pa nan futuro ta no mas miho y pa crea lidernan den futuro.
Bunita den e sentido ta cu tur hende trahando eynan tin e motivacion y pasion pa guia e muchanan. Tambe nan tin boluntario cu tin e mesun pasion y cu ta bin tambe pa yuda e team di YMCA, segun directora di e organisacion, Rachel Croes.
E ta sigui splica cu mirando cu a scucha comentarionan cu antes YMCA tabata un organisacion hopi activo.
YMCA ta activo na San Nicolas a base di deporte. Mirando e situacion na
Dakota, tabata tin di haber cu e parti di construccion di e edificio. Nan a traha un basketball court pafo. A causa cu e actividadnan aki a stop. Pa siguridad di e muchanan no por a laga nan bay pafo, ora tin construccion ta tuma luga. Loke falta pa haci esaki activo bek ta grupo di boluntario cu por yuda cu tin e pasion pa haci esaki y pa tin e inzet pa pone nan tempo liber pa por sigui cu e actividadnan na Dakota y haci’e uno activo bek.
E parti di tecnologia ta uno hopi grandi, segun Croes. A base di experiencia, ta mustra cu e hobennan cu ta cana drenta, ta hobennan cu ta interesa den movecion. Ta hobennan di 16 aña bay ariba pa haci deporte. Maske hende ta bisa cu tecnologia ta hungando un rol grandi cu henter dia nan ta tras di telefon, pa duna nan oportunidad y chens pa ta actief bezig na YMCA.
Rachel Croes a sigui elabora cu pa convence mayornan riba e parti di obesidad, ta pa splica nan cu tin problema di obesidad na Aruba. Ora cu ta invita mayor y muchanan pa bin join den diferente camp, tin summer camp, tin october camp y no ta solamente e parti deportivo, sino recreativo tambe. Ta traha riba diferente aspecto riba e desaroyo di e mucha, manera e parti social. Ta purba di splica e mayornan cu ta overall development di e mucha ta importante y pa asina nan tambe wak e importancia pa inscribi nan yiu, pa nan bay YMCA.
Croes a agrega cu loke nan ta haci hopi ta haci uzo di media. Nan tin nan pagina di facebook YMCA Aruba. Eyriba nan ta hopi activo. Ta pone tur e potretnan cu video pa mayornan tin un bista tambe di kico nan ta haciendo riba base diario. Ta haci hopi uzo di noticia, ta pone articulonan den corant pa yama atencion di e mayornan.
Tambe mirando cu e grupo di boluntario ta birando menos, ta purba cu e miembronan di staff pa parti flyers. Pero mas tanto ta purbando via media, via television, via corant, radio, diferente social media pa yama atencion di e mayor y hobennan. Mester di boluntario pa diferente area. Ta busca boluntario pa campnan cu tin, sea pa helpers, guia, pero ta pensa tambe riba e parti deportivo cu kier start bek cu volley y basket na Dakota. Mester boluntario cu por fungi como un sportcoordinator. Ta buscando hendenan cu tin e pasion cu por yuda y por bisa cu ta algo cu por bira a largo plazo y no pa un of dos biaha so.