Siendo un organisacion trahando specialmente na interes di muchanan di Aruba, YMCA ta recaudando fondo pa por ehecuta nan proyectonan. Un di e formulanan ta dor di organisa e teleton anual, unda celebridadnan ta yama dunadonan pa haci un aporte financiero.
Young Men’s Christian Association (YMCA) ta funda dia 6 di juni 1844 dor di George Williams na London, Inglatera. Su oficina principal ta na Geneve, na Suisa. Mas di 57 miyon hende ta beneficia di e asociacion estableci den 125 pais rond mundo. E lema principal di e organisacion internacional ta empodera hendenan hoben.
Bob Steele a funda YMCA Aruba mas di 60 aña pasa dor di e necesidad pa bin cu un luga pa hobennan pa evita cu nan lo ta riba caya. YMCA tin como meta pa crea personanan util y habil den nos comunidad pa medio di brinda guia y motivacion, pa asina nan ta un influencia positivo ariba nan contemporaneonan.
YMCA ta ofrece diferente actividadnan manera campamento pa mucha, campamento pa hoben, recreacion deportivo manera p.e. volleyball y basketball y otro deporte, como tambe eventonan social. YMCA a cuminsa cu e prome “Tra’i merdia”, yama Y’s Care (YMCA Care) cu a cuminsa na Aruba 26 aña pasa cu un programa di asistencia cu huiswerk y recreo.
Di e forma aki Aruba Bank ta subraya nan rol di bon ciudadano corporativo y di ta semper dispuesto pa duna bek na e comunidad cu semper a sa di sostene nan.