Recientemente YMCA Aruba a organisa un curso di cuminda Chines/Indones cual a conta cu un tremendo acogida. Glenn Ridderstap ta instructor y a laga sa cu tabatin un grupo grandi di cursista cu a tuma les di cuminda Chines/Indones unda tabatin un anochi final hopi emocionante.
Pa finalisa e curso, tabata un anochi di reunion caminda a conta cu presencia di diferente chef y gerentenan di restaurant cu a bay pa husga e cuminda Chines y Indones cu e cursistanan a prepara. For di e 24 participantenan, a scoge 3 ganado den e asina yama “Chef Glenn’s Final Challenge”.
Den e curso aki tabatin dos les pa siman. Un di cuminda Chines y otro di cuminda Indones. E entusiasmo di e participantenan tabata tremendo. “Nan a haci nan best, un a yuda otro. E recetanan cu nan a prepara y e resultado tabata hopi dushi mes”, asina Chef Ridderstap a indica.
E ganadonan di e “challenge” a resulta e cursistanan Nataly van Trikt, Aurora Vinasco y Angela Vinasco pa e cuminda “Chop Suey” cu aros blanco. Na di dos luga a keda Nathaly Boyce y Dominique Cornett (kende a haci stage cerca e Chef) cu a prepara “Boemboe Bali” y na di tres luga a keda Dorethy de Kort y Lourdes Croes cu a prepara un dushi Sate di galiña cu saus di pinda.
Nataly van Trikt kende tabata den e ekipo ganado a duna di conoce cu e curso a bay hopi lihe. Tabata dos siman y mey riba diamars y diahuebs cu un energia hopi positivo. Tabatin mas di 20 hende den cushina cushinando diferente plato. Na final di e anochi a purba tur e cuminda cu a wordo prepara y esey tabata hopi great.
Tur anochi a traha den ekipo unda tabata tin un bon cooperacion. Ademas di ta un bon experiencia por haya oportunidad di conoce hende den un ambiente ameno. El a indica cu ya caba nan a pidi YMCA pa tuma nan na cuenta pa e cursonan benidero.
“Aworaki nos a haci e curso di cuminda Chines/Indones y lo ta great pa bay un “level up”. Esey ta cosnan cu Glenn por pensa pa 2017”, asina Natali Van Trikt a bisa cu un sonrisa riba su cara.
Chef Ridderstap a agrega cu na October lo cuminsa cu e cursonan special pa e temporada di Pasco y Aña Nobo cu cuminda manera ayaca, “pan de hamon”, tur sorto di snacks. Despues di carnaval, por ehempel, lo cuminsa cu specialidadnan pa e temporada di Cuaresma cu tur sorto di cuminda di lama. Lo sigui cu cuminda crioyo.
YMCA Aruba ta ofrece cursonan henter aña. E cursonan semper ta yen, Glenn Ridderstap a laga sa. Keda pendiente pa mas informacion relaciona cu e cursonan aki. Pa informacion por pasa na oficina di YMCA na San Nicolas, situa na Pastoor Hendrikstraat 55 of na e oficina na Dakota situa na Calabasstraat 1. Tambe por yama libremente na 582-3072 (Dakota) of 584-5303 (San Nicolas).
A funda Young Men’s Christian Association (YMCA) dia 6 di juni 1844 door di George Williams na London, Inglatera. Su oficina principal ta na Geneve, na Suisa. Mas di 57 miyon hende ta beneficia di e asociacion estableci den 125 pais rond mundo. E lema principal di e organisacion internacional ta empodera hendenan hoben. Bob Steele a funda YMCA Aruba 60 aña pasa dor di e necesidad pa bin cu un luga pa hobennan pa evita cu nan lo ta riba caya. YMCA tin como meta pa crea personanan util y habil den nos comunidad pa medio di brinda guia y motivacion, pa asina nan ta un influencia positivo ariba nan contemporaneonan.
YMCA ta ofrece diferente actividadnan manera campamento pa mucha, campamento pa hoben, recreacion deportivo manera p.e. volleyball y basketball y otro deporte, como tambe eventonan social. YMCA a cuminsa cu e prome “Tra’i merdia”, yama Y’s Care (YMCA Care) cu a cuminsa na Aruba 24 aña pasa cu un programa di asistencia cu huiswerk y recreo.