Durante e lunanan binidero e staf di YMCA Aruba lo ta trahando duro pa recauda fondo pa un meta. E meta ta pa nan por sigui cu implementacion di nan proyectonan social. YMCA Aruba ta un organisacion cu ta enfoca ariba e desaroyo di hobennan riba diferente area, entre otro e area intelectual, fisico y spiritual.
“Nos organisacion no ta uno solamente unda e hoben y mayornan por drenta y haci uzo di e facilidad. E ta uno tambe cu ta duna e hobennan un atmosfera di siguridad. Esaki ta percura pa ta un influencia positivo riba e bienestar y desaroyo di e hobennan”, Director di YMCA Aruba, Rachel Croes, a remarca.
YMCA su deseo ta pa sigui cu e implementacion di nan proyectonan social. Pa por haci esaki, nan lo ta organisando un teleton cu lo tuma luga dia 1 di Juni na YMCA Dakota. “Primeramente nos ta gradici cada un persona den comunidad cu a sa di sostene nos organisacion durante e ultimo añanan. Nos ta invita tambe pueblo Aruba, tur celebridadesnan y donantes pa bin y yuda nos sostene nos organisacion ariba 1 di juni na YMCA Dakota”, Croes a remarca.
Pa YMCA ta importante pa alcansa e suma di 100 mil florin. “Cu e ayudo di nos comunidad, nos ta spera di yega na e suma akinan”, asina Croes a remarca. Esunnan cu ta desea di ricibi mas informacion di e teleton, por yama na YMCA Dakota na telefon 5823072 of por manda un e-mail tambe na [email protected].