YMCA un biaha mas tin su telethon anual. Esaki ta pa yuda nan recauda fondo, pa asina nan por yega na locual ta e suma di 100 mil florin, cu nan lo bay hinca bek den e proyectonan pa nan por sigui funciona manera cu nan ta funciona. Segun miembro di directiva di YMCA Aruba, Anky Vrolijk, mas cu claro ta un tarea basta duro y no por haci’e sin e celebridadnan. Tur persona cu lo invita, pero tambe tur persona cu ta sinti na mes celebridad, ta invita nan pa dia 1 di Juni na YMCA na Dakota, di 6’or pa 9’or pa yega na e fondonan necesario pa e muchanan y comunidad di Aruba.
Vrolijk a splica cu ta papiando di tur celebridad en general, esnan cu tin netwerk pa logra yega na e fondonan aki. Tambe ta papia di Service Clubs cu semper a yuda cu ta un di e motornan grandi tras di e telethon di YMCA Aruba, pero mas cu claro tur persona cu ta desea di yega y yuda. Politiconan tambe ta mas cu claro invita y tambe artistanan den nos comunidad. Asina por bin y yuda pa yega e meta di 100 mil florin.
Antes tabata haci e telethon riba diabierna, cu tabata hopi dificil pa haya cantidad di hende. Fin di siman hopi biaha tin diferente actividad caba y pesey a scoge concientemente pa haci’e riba un diahuebs, cu a ripara tambe, experiencia cu e resultado ta hopi mas miho.
Ta bay tin lista di number di telefon. Persona y companianan cu ya a haci donacion caba den e añanan anterior. Mas cu claro si conoce un persona cu kier haci donacion, por yama tambe. Ta bay tin telefon tambe cu ta bay haya sponsor cu por yuda. Ta bay tin charger. Hopi biaha e celebridadnan ta prefera di uza nan mesun telefon, mirando cu eynan nan tin nan number caba. Y locual a bin ripara tambe cu ta hendenan ta yama nan amigonan, hendenan conoci. Esaki ta haci e proceso mas facil y e dia siguiente lo cuminsa na colecta e placa aki.
Vrolijk a splica cu tin basta cara nobo den YMCA. Intencion ta pa bin cu formulanan nobo pa por yega na e placa aki, pasobra ta conciente tambe cu tur aña ta bira mas dificil. Ta miembro tambe di YMCA Latino America y YMCA World Alliance, caminda cu ta siñando diferente forma, no solamente riba tereno nacional, pero tambe internacionalmente con por yega na fondo, pasobra tin hopi posibilidad. Tin personanan di afo cu ta bay bin Aruba aki paar di luna, pero tambe nan mes a biaha bay Haiti, San Diego. San Diego tabata specifica con pa yega na donacionnan internacional, pa por sigui funciona, segun Anky Vrolijk.