E periodo di fin di aña ta acercando y esaki ta trece cune un periodo nobo di e Programa Educativo y Progresivo cu YMCA Aruba ta ofrece na nos comunidad. YMCA ta ofrece den e periodo venidero diferente curso di cushina y di computer. Mirando e peticion grandi pa e lesnan di computer, YMCA Aruba a opta pa ofrece e cursonan di computer un bes mas na e comunidad di Aruba. Di e manera aki YMCA ta crea e posibilidad pa e personanan cu no a logra di haya un cupo pa e cursonan den e periodo anterior, pa por participa den e periodo venidero.
Ta trata aki di e cursonan “Word for beginners”, “Excel for beginners” y “Adope Photoshop for beginners”. YMCA Aruba ta amplia su cursonan di computer door di añadi un curso di “Power Point”. Tur curso di computer ta wordo ofreci na ambos YMCA Dakota como YMCA San Nicolas, cu excepcion di Adobe Photoshop cual ta wordo ofreci solamente na YMCA Dakota.
Tin un peticion grandi tambe pa curso di cuminda pa Pasco y fin di aña. Pa es motibo YMCA Aruba ta ofrece den e periodo venidero les di Snacks y dessert pa fin di aña, como tambe les di specialidades pa Pasco y fin di aña. Tambe YMCA lo tin un curso nobo di Healthy Cooking pa e personanan cu ta desea di come y biba mas saludabel.
E diferente cursonan lo wordo duna door di nos instructornan cual ta e.o. Glenn Ridderstap, Willem Seferina y Jacqui Woodley. Tur curso ta inicia den e siman di 31 di October 2016 di 6:30pm pa 9:00pm. Cada curso tin un duracion di 5 siman y e les lo tuma luga un biaha pa siman. E prijs pa tur curso ta 150 Florin cu excepcion di esunnan di cushinamento cual tin un extra costo pa loke ta ingrediente. Na final lo duna tur cursista un certificado di participacion.
Pa inscripcion por pasa na oficina di YMCA Dakota y San Nicolas. YMCA ta haci peticion na tur cursista pa pasa I inscribi prome cu diabierna 28 di October 2016. Pa mas informacion por yama libremente na 582-3072 na YMCA Dakota of na YMCA San Nicolas na 584-5303. Por sigui tur informacion y keda actualisa riba e actividadnan di YMCA Aruba tambe pa medio di nan pagina di Facebook: YMCA Aruba.
A funda Young Men’s Christian Association (YMCA) dia 6 di juni 1844 dor di George Williams na London, Inglatera. Su oficina principal ta na Geneve, na Suisa. Mas di 57 miyon hende ta beneficia di e asociacion estableci den 125 pais rond mundo. E lema principal di e organisacion internacional ta empodera hendenan hoben. Bob Steele a funda YMCA Aruba 60 aña pasa dor di e necesidad pa bin cu un luga pa hobennan pa evita cu nan lo ta riba caya. YMCA tin como meta pa crea personanan util y habil den nos comunidad pa medio di brinda guia y motivacion, pa asina nan ta un influencia positivo ariba nan contemporaneonan.
YMCA ta ofrece diferente actividadnan manera campamento pa mucha, campamento pa hoben, recreacion deportivo manera p.e. volleyball y basketball y otro deporte, como tambe eventonan social. YMCA a cuminsa cu e prome “Tra’i merdia”, yama Y’s Care (YMCA Care) cu a cuminsa na Aruba 24 aña pasa cu un programa di asistencia cu huiswerk y recreo.