TABASCO, Mexico – Un 43,9% di e muhenan Mexicano mayor di 15 aña a enfrenta violencia di parti di nan pareha of ex pareha.
“Mi ta cansa cu bo ta dal mi mama, no sigui dal’e, please”, lo tabata e suplica di un menor cu tin 10 aña, un rato prome cu el a tuma e cuchiu y herida su tata den su pulmon robes. E tata a muri prome cu el a yega hospital pa wordo atendi.
E hecho aki a tuma luga diadomingo ultimo den e municipio Paraiso, den e estado Mexicano Tabasco,ora cu e homber a yega e cas familiar y a maltrata e muhe despues di un discusion. E anochi prome el a maltrata e muhe caba, segun e medio local Tabasco Hoy, pa cual e mucha a pidi’e pa no haci esaki mas.
Polis di Siguridad Publico a tuma nota di e hechonan y Ministerio Publico lo ta esun encarga di e investigacion. Sin embargo, door cu ta trata di un mucha di 10 aña di edad, un menor, e no por wordo acusa y hiba huicio.
Conmocion riba rednan social
E caso a hala atencion riba rednan social, unda cu usuarionan a haci un yamada pa stop cu violencia contra di e hende muhe y e maltrato contra di menornan di edad.
Riba Twitter a destaca tambe e responsabilidad di e sociedad pa stop cu violencia y cu esaki ta infringi e capa social.