NEW YORK CITY, New York – Eric, un di e yiunan di e candidato Republicano pa Cas Blanco, Donald Trump, a viola diamars un ley estatl di New York cu ta prohibi di saca potret di e formularionan electoral, ora el a publica riba su cuenta di Twitter un imagen di e voto cu el a emiti pa su tata.
“Ta un honor increibel di vota pa mi tata! E lo haci un trabao asina grandi pa Merca!”, Eric Trump a tweet awe, hunto cu un potret di su formulario, caminda cu ta aparece e opcion marca di Donald Trump.
New York ta un di e 18 estadonan di e pais caminda pa haci un potret di e formulario of tuma un selfi’e cun’e, ta ilegal, algo cu loke e yiu di candidato Republicano parce a haya sa un poco despues, mirando cu el a stuff e tweet di su cuenta oficial.
Mientras cu algun di e estadonan tin legislacionnan mas ambiguo riba e tema, na New York, ta ilegal mustra “cualkier persona” e formulario prepara pa vota, algo cataloga como un “delito menor” bao di un ley estatal aproba 126 aña pasa.
Viola e ley aki por hiba na un multa di 1000 dollar of incluso un aña di prizon, segun Hunta Electoral di New York.
Un grupo di ciudadano di e estado a lansa recientemente un demanda legal pa cambia e medida ey, pero un hues federal a nenga na esaki diahuebs ultimo, ora el a argumenta cu “e interes di e publico durante eleccionnan ordena ta hopi superior na e demandantenan den publica selfies cu nan formulario.”
Saca potret di e formularionan aki tambe ta ilegal na Alabama, Alaska, Colorado, Florida, Georgia, Illinios, Kansas, Massachusetts, Michigan, Mississippi, Nevada, New Jersey, New Mexico, North Carolina, South Carolina, South Dakota y Wisconsin, mientras cu e otro estadonan tin normativanan poco cla al respecto.
Fuente: NTN24