EAST LIVERPOOL, Merca – Riba e potret cu nos usuarionan por mira, cu polis di East Liverpool (Ohio) a pone riba Facebook, ta papia pa su mes. Riba e potret tin dos adulto inconciente, droga door di heroina. Parti patras di e auto tin un mucha chikito, cu su wowonan inocente ta wak e lens. Polis Mericano a bisa cu nan ta comparti e imagennan aki pa expresa “e otro banda di e droga teribel aki.” Na Ohio ta campa un epidemia di heroina, segun polis.
Siman pasa polis a haya un melding cu tabata tin un auto ta core zig zag riba caminda. Agentenan a bay riba dje y a nota cu dicho auto casi a dal contra di un bus di scol. Despues e conductor a brake diripente. Polis a bin cerca y a wak un homber ta manera cabisha tras di stuur. El a bisa algo cu e kier hiba e dama banda di dje, kende tabata notablemente inconciente den su stoel, na un hospital.
Mucha chikito
E agentenan a hinca su brasa den e auto pa asina coy e yabinan for di e contact, pa asina e conductor no core bay. Diripente el a mira un mucha homber chikito sinta keto asina parti patras. Despues a bin resulta cu e mucha homber tin cuater aña y ta yiu di e dama. E mucha a wordo pasa pa proteccion di mucha.
E homber tambe despues a bay flauw. Ora cu ambos adulto a bin bij, nan a wordo hiba hospital. Ambos a wordo atendi pa trece un mucha na peliger y tambe cu nan tabata bao di influencia den publico. Tambe e homber a wordo condena di a core bao di influencia.
Fuente: De Telegraaf