SAN’A, Yemen- Despues di dos aña di guerra Yemen ta pasando den un crisis humanitario sin precedente den e historia moderno di e pais.
Den e conflicto, entre forsanan di gobierno apoya pa un coalicion dirigi for di Saudi Arabia y e movimento rebelde di e Hutienan, a provoca e colapso di e rednan di abastecimento di awa, sistema di salud y sanidad.
Ta calcula cu 10 mil persona a muri y 40 mil mas a resulta herida.
Un blokeo imponde door di e coalicion a causa un desaster humanitario, cu 70% di e poblacion den necesidad di yudansa urgente.
E conflicto a cumisna na 2015 ora cu rebeldenan Hutienan, di confesion Chiita, a halsa contra e gobierno di Presidente Abdrabbuh Mansour Hadi (Sunita), acusando e di corrupcion.
Actualmente parti zuid di e pais ta bou di control di gobierno, apoya pa e coalicion encabesa pa Saudi Arabia, y e parti noord ta controla pa e rebeldenan Hutie, cu ta conta cu e respaldo di Iran.
Gran parti di e poblacion ta contagia cu e virus di Colera. Mayoria di e esunnan contagia no ta presenta sintomanan of tin solamente sintomanan leve, pero den casonan severo e malesa por mata un persona den cuestion di ora, si e no haya tratamento.
Mas di 100 mil Yemenita a wordo contagia cu colera den e ultimo lunanan, cual ta e brote di malesa mas pio den historia.
Hospitalnan ta sobrepobla y e escazes di alimento a causa un malnutricion extenso, con lo cual e hendenan, specialmente mucha, ta esunnan mas vulnerabel na e infeccion.
Fuente: http://www.bbc.com/mundo/