Algo prome cu 1’or di merdia a sosode un accidente cu basta daño material na e famoso crusada di Sero Pita. Varios accidente caba a sosode den e area ey.
E accidente a sosode net na e crusada. Un Chevrolet Spark tabata biniendo for di Piedra Plat y mester a bay direccion di Tamarijn. E Yaris tabata biniendo di Sero Pita pa baha bay direccion di Piedra Plat (direccion pa yega Centro Kibrahacha). Chauffeur di e Yaris a splica Polisnan cu el a para y ora cu el a mira cu no tin auto, e sigui. Pero e Spark tabata hopi cerca cu e no por a haci nada mas y nan a dal den otro.
Dos ambulance a yega na e sitio pa atende cu e dos ocupantenan cu a resulta levemente herida.