DEN HAAG – E trayectoria di logra e independencia completo pa Aruba, Corsou y St. Maarten mester wordo completa. Gobierno Hulandes mester acerca Nacionnan Uni pa discuti esaki.
E partido liberal democratico VVD, y e Partido Socialista SP a haci un yamado riba e di dos dia di tratamento di e presupuesto di Relacionnan di Reino pa 2017 den Tweede Kamer di Parlamento Hulandes riba diahuebs.
Miembronan di Parlamento Andre Bosman (VVD) y Ronald van Raak (SP) a presenta un mocion conhunto na final di un debate largo caminda cu nan a pidi e Gobierno Hulandes pa consulta Nacionnan Uni, hunto cu Aruba, Corsou y St. Maarten, pa yega na un “cumplimento defintivo di e derecho di liber determinacion di tur e paisnan den Reino.”
Den e mocion, Bosman y van Raak a haci mencion di e proceso di decolonisacion di Nacionnan Uni cu a cuminsa desde 1945 y e hecho cu e Kingdom Charter di 1954 tabata “e prome paso den e proceso di decolonisacion.” Di acuerdo cu e mocion, e Charter nunca tabata e meta final pa haci husticia na full e derecho di auto determinacion di tur e paisnan dentro di Reino.
E minister Hulandes di Asuntonan Interior y relacionnan den Reino, Ronald Plasterk a purba di convence Bosman cu tabata un ehercisio inutil” pa bay Nacionnan Uni sin e concentimento di e paisnan di Caribe Hulandes riba e asunto aki, specialmente si e paisnan a vocifera nan obhecion na Nacionnan Uni.
E minister a bisa cu e lo discuti prome e paso importante aki den e historia di Reino cu e tres paisnan prome cu bay Nacionnan Uni.
Bosman subsecuentemente a bay di acuerdo pa laga un banda e movemento pa awo, den e orden pa duna e minister e chens pa drenta den discusion cu e paisnan den Caribe. Plasterk a priminti pa duna un contesta prome cu dia 31 di December di e aña aki.
E cuestion di independencia a provoca un debate entre Plasterk y Bosman, cu ta papia riba puntonan di bista opuesto riba e asunto. “Nos no ta di acuerdo riba e obhetivo final,” Plasterk a bisa, kende a pone bon cla cu e no a pensa cu independencia di Aruba, Corsou y St. Maarten no ta un gran idea.
fuente: The Daily Herald of St. Maarten